ಕುಡಿದ ಮತ್ತಿನಲ್ಲಿ ಲಿವ್–ಇನ್ ಪ್ರೇಯಸಿಯ ಕೊಲೆ; ಶವವನ್ನು ಕಾರಿನಲ್ಲಿ ಬಿಟ್ಟು ಮಲಗಿದ ಆರೋಪಿ!

ನವದೆಹಲಿ, ನ. 27: ನೈಋತ್ಯ ದೆಹಲಿಯ ಚಾವ್ಲಾದಲ್ಲಿ ಕುಡಿದ ಮತ್ತಿನಲ್ಲಿ ಲಿವ್–ಇನ್ ಸಂಗಾತಿಯನ್ನು ಉಸಿರುಗಟ್ಟಿಸಿ ಕೊಲೆ ಮಾಡಿದ ವ್ಯಕ್ತಿಯೊಬ್ಬ, ಶವವನ್ನು ಕಾರಿನ ಡಿಕ್ಕಿಗೆ ಹಾಕಿ ವಿಲೇವಾರಿ ಮಾಡಲು ಯತ್ನಿಸಿದರೂ, ಅಮಲಿನ ತೀವ್ರತೆಯಿಂದ ಮನೆಯಿಂದ ಕೇವಲ ಕೆಲವು ಮೀಟರ್ ದೂರವೇ ಕಾರು ನಿಲ್ಲಿಸಿ ಮನೆಯಲ್ಲಿ ಮಲಗಿದ ಘಟನೆ ಬೆಳಕಿಗೆ ಬಂದಿದೆ.

ಇಬ್ಬರು ಮಕ್ಕಳ ತಂದೆಯಾದ 35 ವರ್ಷದ ವೀರೇಂದ್ರ ಎಂಬಾತ ವಿವಾಹಿತನಾಗಿದ್ದು, ಕಳೆದ ಎರಡು ವರ್ಷಗಳಿಂದ 44 ವರ್ಷದ ಮಹಿಳೆಯೊಂದಿಗೆ ಲಿವ್–ಇನ್ ಸಂಬಂಧದಲ್ಲಿ ಚಾವ್ಲಾದ ಮನೆಯಲ್ಲಿ ವಾಸಿಸುತ್ತಿದ್ದ. ಮಹಿಳೆ ಪಾಲಂನಲ್ಲಿ ಮನೆ ಹೊಂದಿದ್ದು, ಅದನ್ನು ಮಾರಾಟ ಮಾಡಿದ ಹಣದಿಂದ ವೀರೇಂದ್ರ ಆಗಸ್ಟ್‌ನಲ್ಲಿ ತನ್ನ ಹೆಸರಿನಲ್ಲೇ ಮೂರು ಅಂತಸ್ತಿನ ಮನೆಯನ್ನು ಖರೀದಿಸಿದ್ದ. ಮಾರಾಟದಲ್ಲಿ ಉಳಿದ 21 ಲಕ್ಷ ರೂ. ವೀರೇಂದ್ರ ಬಳಿಯೇ ಉಳಿದಿದ್ದರೂ, ಅದೇ ವಿಷಯ ಆಗಾಗ ವಿವಾದಕ್ಕೆ ಕಾರಣವಾಗುತ್ತಿತ್ತು.

ನವೆಂಬರ್ 25ರ ಮಧ್ಯರಾತ್ರಿ ಇಬ್ಬರೂ ಮದ್ಯಪಾನ ಮಾಡುತ್ತಿದ್ದ ವೇಳೆ ಜಗಳ ತೀವ್ರಗೊಂಡು, ವೀರೇಂದ್ರ ಮಹಿಳೆಯನ್ನು ಹಾಸಿಗೆಯ ಮೇಲೆ ಒತ್ತಿಹಿಡಿದು ಕತ್ತು ಹಿಸುಕಿದ. ಬಳಿಕ ಆಕೆಯ ಶವವನ್ನು ಕಾರಿನ ಡಿಕ್ಕಿಗೆ ಸಾಗಿಸಲು ಇಬ್ಬರು ಸ್ನೇಹಿತರ ಸಹಾಯ ಪಡೆದಿದ್ದಾನೆ ಎಂದು ಪೊಲೀಸರು ಹೇಳಿದ್ದಾರೆ.

ಘಟನೆಯ ರಾತ್ರಿ ಮತ್ತಿನ ಪ್ರಮಾಣ ಹೆಚ್ಚಾಗಿದ್ದ ಕಾರಣ, ವೀರೇಂದ್ರ ಕಾರು ಚಲಾಯಿಸಲು ವಿಫಲವಾಗಿದ್ದು, ಸುಮಾರು 100 ಮೀಟರ್ ದೂರದಲ್ಲಿಯೇ ಕಾರು ನಿಲ್ಲಿಸಿ ಮನೆಗೆ ಹಿಂದಿರುಗಿ ಮಲಗಿದ್ದಾನೆ. ಕಾರಿನಲ್ಲೇ ಶವ ಬಿದ್ದಿದ್ದನ್ನು ಬೆಳಿಗ್ಗೆ ನೆರೆಹೊರೆಯವರು ಕಂಡು ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ.

ಘಟನಾ ಸ್ಥಳಕ್ಕೆ ಧಾವಿಸಿದ ಪೊಲೀಸರು ಶವವನ್ನು ವಶಪಡಿಸಿಕೊಂಡು ಮರಣೋತ್ತರ ಪರೀಕ್ಷೆಗೆ ಕಳುಹಿಸಿದ್ದು, ಆರೋಪಿ ವೀರೇಂದ್ರನನ್ನು ಬಂಧಿಸಿದ್ದಾರೆ. ಶವ ಸಾಗಾಟಕ್ಕೆ ಸಹಕರಿಸಿದ್ದ ಸ್ನೇಹಿತರನ್ನು ವಿಚಾರಣೆಗೆ ಒಳಪಡಿಸಲಾಗಿದೆ ಎಂದು ತಿಳಿದು ಬಂದಿದೆ.