ಗೋಣಿಕೊಪ್ಪ ದಸರಾದಲ್ಲಿ ಸಂಜಿತ್ ಸ್ವರ ಮಾಧುರ್ಯದ ಮೋಡಿ
admincoorgdaily
ಗೋಣಿಕೊಪ್ಪಲು : ಶ್ರೀ ಕಾವೇರಿ ದಸರಾ ಸಮಿತಿ, ಗೋಣಿಕೊಪ್ಪಲು ಹಾಗೂ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ಸಹಯೋಗದಲ್ಲಿ ನಡೆಯುತ್ತಿರುವ ಗೋಣಿಕೊಪ್ಪಲು ದಸರಾ ಜನೋತ್ಸವದಲ್ಲಿ ಖ್ಯಾತ ಹಿನ್ನೆಲೆ ಗಾಯಕ ಸಂಜಿತ್ ಹೆಗಡೆ ಮತ್ತು ತಂಡದ ಲೈವ್ ಇನ್ ಕಾನ್ಸರ್ಟ್ ಜನರ ಮನ ಸೆಳೆಯಿತು.
ಅದ್ಭುತ ತಾಂತ್ರಿಕ ದೀಪಾಲಂಕಾರ, ಭರ್ಜರಿ ಧ್ವನಿವರ್ಧಕಗಳ ಅಬ್ಬರದ ನಡುವೆ ವೇದಿಕೆಗೆ ಸಂಜಿತ್ ಹೆಗಡೆ ಪ್ರವೇಶಿಸುತ್ತಿದ್ದಂತೆ, ಯುವ ಸಮೂಹದ ಹರ್ಷೋದ್ಗಾರ ಮುಗಿಲು ಮುಟ್ಟಿತು. ನೆಚ್ಚಿನ ಗಾಯಕನನ್ನು ಕಂಡ ಸಂಭ್ರಮದಲ್ಲಿ ಮೈದಾನವೇ ಚಪ್ಪಾಳೆ, ಸಿಳ್ಳೆ ಹಾಗೂ ಕೂಗುಗಳಿಂದ ಮಾರ್ದನಿಸಿತು.
ಖುಷ್ ಖುಷ್, ಮಾಯಾವಿ, ನೆನ್ನೆ ತನಕ ಸೇರಿದಂತೆ ತಮ್ಮ ಜನಪ್ರಿಯ ಸೂಪರ್ ಹಿಟ್ ಗೀತೆಗಳನ್ನು ಹಾಡಿದ ಸಂಜಿತ್ ಹೆಗಡೆ, ತಮ್ಮ ವಿಶಿಷ್ಟ ಗಾಯನದ ಮೂಲಕ ಪ್ರೇಕ್ಷಕರನ್ನು ಸಂಗೀತ ಲೋಕಕ್ಕೆ ಕರೆದೊಯ್ದರು. ರಾಕ್ ಹಾಗೂ ಪಾಪ್ ಶೈಲಿಯ ಸಮ್ಮಿಶ್ರಣದ ಅವರ ಗಾಯನಕ್ಕೆ ಯುವಕ ಯುವತಿಯರು ಹೆಜ್ಜೆ ಹಾಕಿ ಸಂಭ್ರಮಿಸಿದರು.
ಹಾಡೊಂದರ ಬಳಿಕ ಮತ್ತೊಂದು ಹಾಡು ಮೊಳಗುತ್ತಿದ್ದಂತೆ ಪ್ರೇಕ್ಷಕರ ಉತ್ಸಾಹವೂ ಹೆಚ್ಚುತ್ತಲೇ ಸಾಗಿತು. ಪ್ರತಿಯೊಂದು ಹಾಡಿನ ಅಂತ್ಯದಲ್ಲೂ ಸಹಸ್ರಾರು ಮಂದಿ ಸಿಳ್ಳೆ, ಚಪ್ಪಾಳೆ ಹಾಗೂ ಹರ್ಷೋದ್ಗಾರಗಳ ಮೂಲಕ ಮೆಚ್ಚುಗೆ ವ್ಯಕ್ತಪಡಿಸಿದರು. ತಾವು ಹಾಡುವುದರ ಜೊತೆಗೆ ಪ್ರೇಕ್ಷಕರಿಂದಲೂ ಹಾಡಿನ ಸಾಲುಗಳನ್ನು ಹಾಡಿಸಿದ ಸಂಜಿತ್, ಸಂಗೀತ ಪ್ರೇಮಿಗಳೊಂದಿಗೆ ಆತ್ಮೀಯವಾಗಿ ಬೆರೆತು ಸಂಭ್ರಮಿಸಿದರು.
90 ನಿಮಿಷಗಳ ಕಾಲ ನಡೆದ ಈ ಸಂಗೀತ ರಾತ್ರಿಯಲ್ಲಿ ಮಕ್ಕಳು, ಯುವಕರು ಸೇರಿದಂತೆ ಸಾವಿರಾರು ಮಂದಿ ಸಂಗೀತದ ಅಲೆಯಲ್ಲಿ ತೇಲಿದರು. ದಸರಾ ಮೈದಾನದಲ್ಲಿ ನಿರ್ಮಾಣವಾಗಿದ್ದ ಭವ್ಯ ವೇದಿಕೆ, ದೀಪಾಲಂಕಾರ ಹಾಗೂ ಸಂಗೀತದ ಕಂಪನ ಒಟ್ಟಾಗಿ ಗೋಣಿಕೊಪ್ಪಲಿನ ರಾತ್ರಿಯನ್ನು ಮತ್ತಷ್ಟು ರಂಗೇರಿಸಿತು.
ಶಾಸಕ ಎ.ಎಸ್ ಪೊನ್ನಣ್ಣ, ಪತ್ನಿ ಕಾಂಚನ್ ಪೊನ್ನಣ್ಣ ಕಾರ್ಯಕ್ರಮ ವೀಕ್ಷಣೆ;
ಕಾವೇರಿ ದಸರಾ ಸಮಿತಿ ಅಧ್ಯಕ್ಷರು ಹಾಗೂ ವಿರಾಜಪೇಟೆ ಕ್ಷೇತ್ರದ ಶಾಸಕರು, ಮುಖ್ಯಮಂತ್ರಿಗಳ ರಾಜಕೀಯ ಕಾರ್ಯದರ್ಶಿ ಎ.ಎಸ್. ಪೊನ್ನಣ್ಣ ಅವರು ಪತ್ನಿ ಕಾಂಚನ್ ಪೊನ್ನಣ್ಣ ಅವರೊಂದಿಗೆ ಕಾರ್ಯಕ್ರಮವನ್ನು ಕೊನೆಯವರೆಗೂ ವೀಕ್ಷಿಸಿದರು.
ಇದಕ್ಕೂ ಮುನ್ನ ಕೊಡಗಿನ ಉದಯೋನ್ಮುಖ ಗಾಯಕರಾದ ಮನೆಯಪಂಡ ಅಶ್ವಿನ್ ಸುಬ್ಬಯ್ಯ, ಚಂದನ್ ನೆಲ್ಲಿತ್ತಾಯ ಹಾಗೂ ದಿಲನ್ ತಂಡ ರ‍್ಯಾಪ್ ಸಾಂಗ್ ಗಳ ಮೂಲಕ ಪ್ರೇಕ್ಷಕರನ್ನು ರಂಜಿಸಿದರು. ನಾಗರಾಜ್ ಚಿತ್ರಗೀತೆಗಳನ್ನು ಹಾಡಿ ಗಮನ ಸೆಳೆದರು.