ಹಣ, ಜಾತಿ ಬಲದಿಂದ ಮಾತ್ರ ಚುನಾವಣೆ ಗೆಲ್ಲಲು ಸಾಧ್ಯವಿಲ್ಲ, ಸೇವಾ ಮನೋಭಾವವೇ ಮುಖ್ಯ;ಅಜ್ಜಮಾಡ ರಮೇಶ್ ಕುಟ್ಟಪ್ಪ
admincoorgdaily
ಕುಶಾಲನಗರ. ಸೆ.27: ಹಣ ಮತ್ತು ಜಾತಿ ಬಲದಿಂದ ಮಾತ್ರ ಚುನಾವಣೆಯಲ್ಲಿ ಗೆಲುವು ಸಾಧಿಸಲು ಸಾಧ್ಯವಿಲ್ಲ. ಜನಪರ ಕಾಳಜಿ, ಸೇವಾ ಮನೋಭಾವ ಹಾಗೂ ಸಿದ್ಧಾಂತಕ್ಕಾಗಿ ಹೋರಾಡುವ ಗುಣ ರಾಜಕಾರಣಿಗಳಲ್ಲಿ ಇರಬೇಕು ಎಂದು ನಾಗರಿಕ ಸನ್ಮಾನ ಹಾಗೂ ರಾಜಕೀಯ ಜಾಗೃತಿ ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿದ್ದ ಅಜ್ಜಮಾಡ ರಮೇಶ್ ಕುಟ್ಟಪ್ಪ ಅಭಿಪ್ರಾಯಪಟ್ಟರು.
ವಿ.ಪಿ. ಶಶಿಧರ್ ಅವರ 35 ವರ್ಷಗಳ ಸಾರ್ವಜನಿಕ ಜೀವನದ ಗೌರವಾರ್ಥ ನಡೆದ ನಾಗರಿಕ ಸನ್ಮಾನ ಕಾರ್ಯಕ್ರಮದಲ್ಲಿ ವಿಚಾರ ಸಂಕಿರಣದ ಅಧ್ಯಕ್ಷತೆ ವಹಿಸಿ ಮಾತನಾಡಿದ ಅವರು, ಇಂದಿನ ಚುನಾವಣಾ ರಾಜಕೀಯದಲ್ಲಿ ಹಣ, ಜಾತಿ, ಧರ್ಮ, ಭಾಷೆ ಹಾಗೂ ಪ್ರಾಂತ್ಯದ ಲೆಕ್ಕಾಚಾರಗಳು ಪ್ರಮುಖ ಪಾತ್ರ ವಹಿಸುತ್ತಿರುವುದು ವಿಷಾದನೀಯ ಎಂದರು.
ಚುನಾವಣೆಯಲ್ಲಿ ಹಣವೇ ಮುಖ್ಯವಾಗಿದ್ದರೆ ಕೆ.ಎಸ್.ಎಸ್. ಬಾಬು ಅವರು ಬಹಳ ಹಿಂದೆಯೇ ಶಾಸಕರಾಗಬೇಕಿತ್ತು. ಕೋಟ್ಯಂತರ ರೂಪಾಯಿ ಖರ್ಚು ಮಾಡಿದರೂ ಮತದಾರರು ಅವರನ್ನು ಆಯ್ಕೆ ಮಾಡದಿರುವುದನ್ನು ನಾವು ನೋಡಿದ್ದೇವೆ ಎಂದು ಅವರು ಉದಾಹರಿಸಿದರು.
ಎಂ. ಲಕ್ಷ್ಮಣ್ ಅವರ ರಾಜಕೀಯ ಹೋರಾಟವನ್ನು ಉಲ್ಲೇಖಿಸಿದ ರಮೇಶ್ ಕುಟ್ಟಪ್ಪ, ಹಲವು ವರ್ಷಗಳಿಂದ ಅವರನ್ನು ತಾನು ಗಮನಿಸುತ್ತಿದ್ದು, ಹಣ ಖರ್ಚು ಮಾಡುವ ಸಾಮರ್ಥ್ಯವಿಲ್ಲದಿದ್ದರೂ ಸಂಘಟನೆ, ಸಿದ್ಧಾಂತ ಹಾಗೂ ಹೋರಾಟದಲ್ಲಿ ತೊಡಗಿಸಿಕೊಂಡಿದ್ದಾರೆ. ಆದರೆ ಚುನಾವಣೆಯಲ್ಲಿ ಹಣಬಲ ಮತ್ತು ಇತರ ಸಾಮಾಜಿಕ ಲೆಕ್ಕಾಚಾರಗಳು ಪ್ರಭಾವ ಬೀರುತ್ತಿರುವುದರಿಂದ ಇಂತಹವರಿಗೆ ಗೆಲುವು ಕಷ್ಟವಾಗುತ್ತಿದೆ ಎಂದರು.
ಹಿಂದೆ ಚುನಾವಣಾ ಪ್ರಚಾರದ ವೇಳೆ ಅಭ್ಯರ್ಥಿಗಳ ಕರಪತ್ರದಲ್ಲಿರುವ ವಿಚಾರಗಳು ಹಾಗೂ ಅವರ ಆಶಯಗಳನ್ನು ಜನರು ಗಮನಿಸುತ್ತಿದ್ದರು. ಆದರೆ ಇಂದು ಅಭ್ಯರ್ಥಿಯ ಹಣಬಲ, ಜಾತಿ, ಧರ್ಮ, ಭಾಷೆ ಮತ್ತು ಪ್ರಾಂತ್ಯದ ಆಧಾರದ ಮೇಲೆ ರಾಜಕೀಯ ಲೆಕ್ಕಾಚಾರ ನಡೆಯುತ್ತಿರುವುದು ಪ್ರಜಾಪ್ರಭುತ್ವದ ಆಶಯಗಳಿಗೆ ಸವಾಲಾಗಿದೆ. ಭಾರತದ ಬಹುಸಂಸ್ಕೃತಿಯ ಪರಂಪರೆಯನ್ನು ಉಳಿಸಿಕೊಂಡು ವಿಭಿನ್ನತೆಯಲ್ಲಿ ಏಕತೆಯನ್ನು ಬೆಳೆಸಬೇಕಿದೆ ಎಂದು ಹೇಳಿದರು.
ಗ್ಯಾರಂಟಿ ಯೋಜನೆಗಳ ಬಗ್ಗೆ ಎಚ್ಚರಿಕೆ
ದುರ್ಬಲರು ಹಾಗೂ ಶೋಷಿತರಿಗೆ ಅಗತ್ಯವಾದ ಸಹಕಾರ ಮತ್ತು ಕಲ್ಯಾಣ ಯೋಜನೆಗಳು ಬೇಕು. ಆದರೆ ಚುನಾವಣೆಯನ್ನು ಎದುರಿಸುವ ಉದ್ದೇಶದಿಂದ ಯೋಜನೆಗಳನ್ನು ಘೋಷಿಸುವ ಮೊದಲು ಅವುಗಳಿಗೆ ಅಗತ್ಯವಿರುವ ಸಂಪನ್ಮೂಲಗಳ ಬಗ್ಗೆ ರಾಜಕೀಯ ಪಕ್ಷಗಳು ಗಂಭೀರವಾಗಿ ಚಿಂತಿಸಬೇಕು. ಇಲ್ಲವಾದರೆ ನಂತರ ಮೂಲಭೂತ ಸೌಕರ್ಯಗಳನ್ನು ಒದಗಿಸುವಲ್ಲಿ ಸರ್ಕಾರಗಳಿಗೆ ತೊಂದರೆ ಎದುರಾಗಬಹುದು ಎಂದು ಅವರು ಎಚ್ಚರಿಸಿದರು.
ಸಾಮಾಜಿಕ ಜಾಲತಾಣಗಳಲ್ಲಿ ಸುಳ್ಳು ಸುದ್ದಿಯ ಸವಾಲು
ಇಂದಿನ ಸಾಮಾಜಿಕ ಜಾಲತಾಣಗಳ ಯುಗದಲ್ಲಿ ನಾಯಕರು ನೇರವಾಗಿ ಜನರನ್ನು ತಲುಪುವ ಅವಕಾಶ ಹೆಚ್ಚಾಗಿದೆ. ಆದರೆ ಇದೇ ಸಂದರ್ಭದಲ್ಲಿ ಸುಳ್ಳು ಸುದ್ದಿಗಳು, ಅಪಪ್ರಚಾರ ಹಾಗೂ ತೇಜೋವಧೆಯಂತಹ ಬೆಳವಣಿಗೆಗಳು ಹೆಚ್ಚುತ್ತಿರುವುದು ಆತಂಕಕಾರಿ ಎಂದು ರಮೇಶ್ ಕುಟ್ಟಪ್ಪ ಹೇಳಿದರು.
ಜನರ ಬೇಡಿಕೆಗಳೂ ಕೆಲವೊಮ್ಮೆ ಟೀಕೆ-ಟಿಪ್ಪಣಿಗಳಿಗೆ ಸೀಮಿತವಾಗುತ್ತಿವೆ. ರಸ್ತೆ ನಿರ್ಮಾಣವಾದ ನಂತರವೂ ಅದರ ಗುಣಮಟ್ಟದ ಬಗ್ಗೆ ಪ್ರಶ್ನೆಗಳು ಮೂಡುವುದು ಸಹಜ. ಆದರೆ ಜನಪ್ರತಿನಿಧಿಗಳು ಮಾಡಿದ ಉತ್ತಮ ಕೆಲಸವನ್ನು ಗುರುತಿಸುವ ಮನೋಭಾವವೂ ಸಮಾಜದಲ್ಲಿ ಇರಬೇಕು ಎಂದರು.
“ಆದರ್ಶದಿಂದ ಮಾತ್ರ ಚುನಾವಣೆಯಲ್ಲಿ ಗೆಲ್ಲಲು ಸಾಧ್ಯವಿಲ್ಲ”
ಚುನಾವಣಾ ರಾಜಕೀಯದ ವಾಸ್ತವಿಕತೆಯನ್ನು ಅರಿತುಕೊಳ್ಳಬೇಕು. ಹಣ ಖರ್ಚು ಮಾಡದೆ, ಜಾತಿ-ಧರ್ಮದ ಲೆಕ್ಕಾಚಾರ ಮಾಡದೆ, ಉಚಿತ ಘೋಷಣೆಗಳಿಲ್ಲದೆ ಚುನಾವಣೆಗೆ ಸ್ಪರ್ಧಿಸಿದರೆ ಗೆಲುವು ಸುಲಭವಲ್ಲ. ವೇದಿಕೆಯಲ್ಲಿ ಆದರ್ಶಗಳ ಬಗ್ಗೆ ಮಾತನಾಡುವುದು ಒಂದು ವಿಚಾರವಾದರೆ, ಚುನಾವಣಾ ವ್ಯವಸ್ಥೆಯಲ್ಲಿ ಅವುಗಳನ್ನು ಕಾರ್ಯರೂಪಕ್ಕೆ ತರುವುದು ಮತ್ತೊಂದು ಸವಾಲಾಗಿದೆ ಎಂದು ಅವರು ಅಭಿಪ್ರಾಯಪಟ್ಟರು.
ವಿ.ಪಿ. ಶಶಿಧರ್ ಅವರ 35 ವರ್ಷಗಳ ಸಾರ್ವಜನಿಕ ಜೀವನವನ್ನು ಶ್ಲಾಘಿಸಿದ ಅವರು, “35 ವರ್ಷಗಳ ನಂತರವೂ ತಮ್ಮ ನಿಲುವಿನಲ್ಲಿ ಯಾವುದೇ ಬದಲಾವಣೆ ಮಾಡಿಕೊಂಡಿಲ್ಲ. ಕಾರ್ಯಕ್ರಮಕ್ಕಾಗಿ ಗುತ್ತಿಗೆದಾರರು ಹಾಗೂ ಅಧಿಕಾರಿಗಳಿಂದ ಹಣ ಪಡೆಯಬಾರದು ಎಂದು ಅವರು ಸೂಚಿಸಿರುವುದು ಅವರ ನಿಲುವಿನ ಪ್ರತೀಕ” ಎಂದು ಹೇಳಿದರು.
ಚುನಾವಣಾ ರಾಜಕೀಯದಲ್ಲಿ ಕೆಲವು ಹೊಂದಾಣಿಕೆಗಳು ಅನಿವಾರ್ಯವಾಗಬಹುದು. ಆದರೆ ಅಂತಿಮವಾಗಿ ಜನರ ಆಶೋತ್ತರಗಳನ್ನು ಈಡೇರಿಸುವ ಜವಾಬ್ದಾರಿ ಜನಪ್ರತಿನಿಧಿಗಳ ಮೇಲಿದೆ ಎಂದರು.
ಕೊಡಗಿನ ಇಬ್ಬರು ಶಾಸಕರು ದಿನಕ್ಕೆ ಹಲವು ಗಂಟೆಗಳ ಕಾಲ ಕ್ಷೇತ್ರದ ಅಭಿವೃದ್ಧಿ ಹಾಗೂ ಜನರ ಸಮಸ್ಯೆಗಳ ಬಗ್ಗೆ ಕೆಲಸ ಮಾಡುತ್ತಿದ್ದರೂ ಅವರನ್ನು ಟೀಕಿಸುವವರು ಇದ್ದಾರೆ. ಜನರು ತಮ್ಮ ಪ್ರತಿನಿಧಿಗಳ ಕಾರ್ಯವೈಖರಿಯನ್ನು ವಾಸ್ತವಾಂಶಗಳ ಆಧಾರದ ಮೇಲೆ ಪರಿಶೀಲಿಸಬೇಕು ಎಂದು ಹೇಳಿದರು.
ಪ್ರಜಾಪ್ರಭುತ್ವವೆಂದರೆ ಕೇವಲ ಚುನಾವಣೆಯ ದಿನಕ್ಕೆ ಸೀಮಿತವಲ್ಲ. ಮತದಾನದ ದಿನದಿಂದಲೇ ಪ್ರತಿನಿತ್ಯದ ಪ್ರಜಾಪ್ರಭುತ್ವ ಆರಂಭವಾಗುತ್ತದೆ. ಜಾಗೃತ ನಾಗರಿಕತೆ ಪ್ರಜಾಪ್ರಭುತ್ವದ ಆತ್ಮವಾಗಿದ್ದು, ಜಾಗೃತ ಮತದಾರರು ಇರುವ ಸಮಾಜದಲ್ಲಿ ಪ್ರಜಾಪ್ರಭುತ್ವ ಬಲಿಷ್ಠವಾಗಿರುತ್ತದೆ ಎಂದು ರಮೇಶ್ ಕುಟ್ಟಪ್ಪ ಹೇಳಿದರು.
ಕಾರ್ಯಕ್ರಮದಲ್ಲಿ ವಿವಿಧ ಸಮುದಾಯಗಳ ಮುಖಂಡರು, ಜನಪ್ರತಿನಿಧಿಗಳು ಹಾಗೂ ಗಣ್ಯರು ಉಪಸ್ಥಿತರಿದ್ದರು. ಸಭಾಂಗಣದಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿ ಸಾರ್ವಜನಿಕರು ಭಾಗವಹಿಸಿದ್ದರು.