ಕೊಡಗು ಜಿಲ್ಲೆಯಲ್ಲಿ ಬಟರ್ ಫ್ರೂಟ್ ಬೀಜಕ್ಕೂ ಭಾರೀ ಡಿಮ್ಯಾಂಡ್!

(ಕೆ.ಎಂ ಇಸ್ಮಾಯಿಲ್ ಕಂಡಕರೆ)

ಮಡಿಕೇರಿ:ಕೊಡಗು ಜಿಲ್ಲೆಯಲ್ಲಿ ಕಳೆದ ಐದಾರು ವರ್ಷಗಳಿಂದ ಬಟರ್ ಫ್ರೂಟ್(ಬೆಣ್ಣೆ) ಬೆಳೆಯುವವರ ಸಂಖ್ಯೆ ಹೆಚ್ಚಳವಾಗುತ್ತಿದೆ.ವಾರ್ಷಿಕವಾಗಿ ಎರಡರಿಂದ ಮೂರು ಬಾರಿ ಫಸಲು ನೀಡುವುದರಿಂದ ತೋಟದಲ್ಲಿ ಇತ್ತೀಚಿನ ದಿನಗಳಲ್ಲಿ ಬಟರ್ ಫ್ರೂಟ್ ಬೆಳೆಗೆ ಬೆಳೆಗಾರರು ಹೆಚ್ಚು ಆಸಕ್ತಿ ತೋರುತ್ತಿದ್ದಾರೆ.ಇದೀಗ ಜಿಲ್ಲೆಯಲ್ಲಿ ಬಟರ್ ಫ್ರೂಟ್ ಗಿಂತ ಬಟರ್ ಫ್ರೂಟ್ ಬೀಜಕ್ಕೆ ಹೆಚ್ಚು ಬೇಡಿಕೆ ಬಂದಿದೆ. ಒಂದು ಬಟರ್ ಫ್ರೂಟ್ ಬೀಜ 06 ರಿಂದ 08ರೂವರೆಗೆ ಮಾರಾಟವಾಗುತ್ತಿದೆ. ಜಿಲ್ಲೆಯಲ್ಲಿ ಬಟರ್ ಫ್ರೂಟ್ ನರ್ಸರಿಗಳ ಸಂಖ್ಯೆ ಹೆಚ್ಚಳವಾಗುತ್ತಿದ್ದಂತೆ ಬಟರ್ ಫ್ರೂಟ್ ಬೀಜಕ್ಕೂ ಕೂಡ ಡಿಮ್ಯಾಂಡ್ ಬಂದಿದೆ.ಬಟರ್ ಫ್ರೂಟ್ ವ್ಯಾಪಾರಿಗಳು ಬಟರ್ ಫ್ರೂಟ್ ವ್ಯಾಪಾರದೊಂದಿಗೆ ಇದೀಗ ಬಟರ್ ಫ್ರೂಟ್ ಬೀಜದ ವ್ಯಾಪರಕ್ಕೂ ಇಳಿದು ಒಳ್ಳೆಯ ಲಾಭಗಳಿಸುತ್ತಿದ್ದಾರೆ.

 ಬಟರ್ ಫ್ರೂಟ್ ಗಿಡ ಕಸಿ ಮಾಡಲು ಬೀಜ!

ಜಿಲ್ಲೆಯಲ್ಲಿ ಕಳೆದ ಐದಾರು ವರ್ಷಗಳಿಂದ ಬಟರ್ ಫ್ರೂಟ್ ಕಸಿ ಮಾಡಿರುವ ಗಿಡಗಳಿಗೆ ಭಾರೀ ಬೇಡಿಕೆ ಇದೆ. ಕಸಿ ಮಾಡಿರುವ ವಿವಿಧ ಬಟರ್ ಫ್ರೂಟ್ ತಳಿಗಳು ಕರ್ನಾಟಕ,ತಮಿಳುನಾಡು,ಆಂಧ್ರಪ್ರದೇಶದ, ಮಹಾರಾಷ್ಟ್ರ,ಕೇರಳ ರಾಜ್ಯಗಳಿಗೆ ಕೊಡಗು ಜಿಲ್ಲೆಯಿಂದ ಸರಬರಾಜು ಆಗುತ್ತಿದೆ.ಬಟರ್ ಫ್ರೂಟ್ ಕಸಿ ಮಾಡಿರುವ ಗಿಡಗಳು 100 ರಿಂದ 150ರೂಗಳವರೆಗೆ ಮಾರಾಟವಾಗುತ್ತಿದೆ.ಹೊರ ರಾಜ್ಯಕ್ಕೆ ವಾರ್ಷಿಕವಾಗಿ ಲಕ್ಷಾಂತರ ಗಿಡಗಳು ಸರಬರಾಜಾಗುತ್ತಿದೆ. ಬಟರ್ ಫ್ರೂಟ್ ಕಸಿ ಮಾಡಿರುವ ಗಿಡಗಳಿಗೆ ಬೇಡಿಕೆ ಹೆಚ್ಚಾಗುತ್ತಿದ್ದಂತೆ ಬಟರ್ ಫ್ರೂಟ್ ಬೀಜಕ್ಕೂ ಡಿಮ್ಯಾಂಡ್ ಹೆಚ್ಚಾಗಿದೆ. ಯಾರಿಗೂ ಬೇಡದೆ ತೋಟದಲ್ಲಿ ಕೊಳತು ಬಿದ್ದಿದ್ದ ಬಟರ್ ಫ್ರೂಟ್ ಬೀಜಗಳಿಗೆ ಇದೀಗ ಎಲ್ಲಿಲ್ಲದ ಬೇಡಿಕೆ ಸೃಷ್ಟಿಯಾಗಿದೆ.ಬಟರ್ ಫ್ರೂಟ್ ನರ್ಸರಿ ಕೃಷಿಯಲ್ಲಿ ತೊಡಗಿಕೊಂಡಿರುವವರು ಬೆಣ್ಣೆ ಹಣ್ಣು ಬೆಳೆದಿರುವವರಿಂದ ಬಟರ್ ಫ್ರೂಟ್ ಬೀಜಗಳನ್ನು ಖರೀದಿಸುತ್ತಿದ್ದಾರೆ. ಅದಲ್ಲದೇ ಬಟರ್ ಫ್ರೂಟ್ ಕೊಯ್ಲಿನ ಸಂದರ್ಭದಲ್ಲಿ ವ್ಯಾಪಾರಿಗಳು 2ರಿಂದ ಮೂರು ರೂಗಳಿಗೆ ಬಟರ್ ಫ್ರೂಟ್ ಬೀಜಗಳನ್ನು ಖರೀದಿಸಿ 6 ರಿಂದ 8 ರೂವರೆಗೆ ನರ್ಸರಿ ಮಾಡುವವರಿಗೆ ಮಾರಾಟ ಮಾಡುತ್ತಿದ್ದಾರೆ. ಬೆಣ್ಣೆ ಹಣ್ಣುಗಳ ಬೀಜಕ್ಕೆ ಡಿಮ್ಯಾಂಡ್ ಸೃಷ್ಟಿಯಾಗುತ್ತಿದ್ದಂತೆ ಬಟರ್ ಫ್ರೂಟ್ ವ್ಯಾಪಾರಿಗಳು ಬಟರ್ ಫ್ರೂಟ್ ಗಿಂತ ಬೀಜ ಖರೀದಿಸಲು ಹೆಚ್ಚು ಆಸಕ್ತಿ ತೋರಿದ್ದಾರೆ.ತೋಟದಲ್ಲಿ ಬಟರ್ ಫ್ರೂಟ್ ಮರಗಳಿಂದ ಹಣ್ಣಾಗಿ ನೆಲಕ್ಕೆ ಬಿದ್ದಿರುವ ಬೀಜಗಳನ್ನು ಹೆಕ್ಕಿ ತೆಗೆದು ಮಾರಾಟ ಮಾಡುತ್ತಿದ್ದಾರೆ. ಅದಲ್ಲದೇ ಕೊಯ್ಲು ಮಾಡುವಾಗ ಹಣ್ಣಾಗಿರುವ ಹಾಗೂ ಬೆಳೆತಿರುವ ಬಟರ್ ಫ್ರೂಟ್ ಗಳಿಂದಲೂ ಬೀಜಗಳನ್ನು ಹೊರತೆಗೆದು ಮಾರಾಟ ಮಾಡುತ್ತಿದ್ದಾರೆ‌. ಜಿಲ್ಲೆಯಲ್ಲಿ ಬಟರ್ ಫ್ರೂಟ್ ಗೆ ಬೇಡಿಕೆ ಹೆಚ್ಚಾದಂತೆ ಜಿಲ್ಲೆಯ ಬಹುತೇಕ ಭಾಗಗಳಲ್ಲಿ ಬಟರ್ ಫ್ರೂಟ್ ಗಿಡಗಳ ನರ್ಸರಿ ಕೂಡ ಹೆಚ್ಚಾಗಿದೆ.ಮನೆಯ ಹಿಂಭಾಗದ ಸಣ್ಣ ಭಾಗದಲ್ಲಿ ಕೂಡ ಬಟರ್ ಫ್ರೂಟ್ ಕಸಿ ಮಾಡಿರುವ ಗಿಡಗಳನ್ನು ಬೆಳೆಸುತ್ತಿದ್ದಾರೆ. ತೋಟಗಳಲ್ಲಿ‌ ಕೊಳೆತು ಬಿದ್ದಿದ್ದ ಬಟರ್ ಫ್ರೂಟ್ ಬೀಜಕ್ಕೆ ಇದೀಗ ಜಿಲ್ಲೆಯಲ್ಲಿ ಬೇಡಿಕೆ ಸೃಷ್ಟಿಯಾಗಿದೆ.

ಜಿಲ್ಲೆಯಲ್ಲಿ ಇದೀಗ ಬಟರ್ ಫ್ರೂಟ್ ಬೀಜಕ್ಕೆ ಹೆಚ್ಚು ಬೇಡಿಕೆ ಇದೆ. ಬಹುತೇಕ ಭಾಗಗಳಲ್ಲಿ ಬಟರ್ ಫ್ರೂಟ್ ನರ್ಸರಿಗಳು ಹೆಚ್ಚಳವಾಗುತ್ತಿದೆ.ಕಸಿ ಮಾಡುವ ಗಿಡಗಳಿಗೆ ಬಟರ್ ಫ್ರೂಟ್ ಬೀಜ ಬೇಕು.ನರ್ಸರಿ ಮಾಡುವವರು ಕಸಿ ಮಾಡಿರುವ ಗಿಡಗಳನ್ನು ಹೆಚ್ಚಾಗಿ ತಯಾರಿಸುತ್ತಿದ್ದಾರೆ.ಎಲ್ಲಾ ಕಡೆಗಳಲ್ಲಿ ಬಟರ್ ಫ್ರೂಟ್ ವ್ಯಾಪಾರಿಗಳು ಇರುವುದರಿಂದ ಬಟರ್ ಫ್ರೂಟ್ ಬೀಜ ಸಿಗುವುದು ಕಡಿಮೆಯಾಗಿದೆ. ಹಣ್ಣಾಗಿರುವ ಬಟರ್ ಫ್ರೂಟ್ ಗಳಿಂದ ಬೀಜ ತೆಗೆದು ಇದೀಗ ಮಾರಾಟ ಮಾಡುತ್ತಿದ್ದೇವೆ.

ರಂಶೀದ್ ಅಮ್ಮತ್ತಿ,ಬಟರ್ ಫ್ರೂಟ್ ವ್ಯಾಪಾರಿ.