ಲೈಂಗಿಕ ಸಮಸ್ಯೆ ಪರಿಹಾರ ಎಂದು ಗ್ರಾಂ.ಗೆ ಒಂದೂವರೆ ಲಕ್ಷಕ್ಕೆ ನಕಲಿ ಲೈಂಗಿಕ ಔಷಧಿ ಜಾಲ; ಗುಜರಾತ್ ಮೂಲದ ಆರೋಪಿ ಮನೋಜ್ ಬಂಧನ

ಬೆಂಗಳೂರು, ಡಿ. 10: ಲೈಂಗಿಕ ಸಮಸ್ಯೆ ಪರಿಹಾರ ಎನ್ನುವ ನೆಪದಲ್ಲಿ ರಾಜ್ಯದ ಹಲವೆಡೆ ‘ಟೆಂಟ್ ಚಿಕಿತ್ಸೆ’ ನಡೆಸಿ ಲಕ್ಷಾಂತರ ರೂ. ವಂಚಿಸಿದ್ದ ನಕಲಿ ಗುರೂಜಿ ವಿಜಯ್ ಚಿತ್ತೋಡಿಯಾನ ಜಾಲಕದ ಇನ್ನೊಬ್ಬ ಸಹಚರನನ್ನೂ ಪೊಲೀಸರು ಬಂಧಿಸಿದ್ದಾರೆ.

 ಟೆಕ್ಕಿ ತೇಜಸ್‌ ಅವರನ್ನು 48 ಲಕ್ಷ ರೂ.ಗೆ ವಂಚಿಸಿದ್ದ ಪ್ರಕರಣದಲ್ಲಿ, ವಿಜಯ್ ಬಂಧನಕ್ಕೆ ಒಳಗಾದ ಕೆಲವು ದಿನಗಳಲ್ಲೇ ಜ್ಞಾನಭಾರತೀ ಪೊಲೀಸರು ಆತನ ಸಹಚರ ಮನೋಜ್ ಸಿಂಗ್ ಚಿತ್ತೋಡಿಯಾನನನ್ನು ತೆಲಂಗಾಣದ ಸೈಬರಾಬಾದ್‌ ನಲ್ಲಿ ಬಂಧಿಸಿದ್ದಾರೆ. ಇಬ್ಬರನ್ನೂ ಪರಪ್ಪನ ಅಗ್ರಹಾರಕ್ಕೆ ಕಳುಹಿಸಲಾಗಿದೆ.

ತೀವ್ರ ಅನಾರೋಗ್ಯ ಸಮಸ್ಯೆ ಎದುರಿಸಿದ್ದ ಟೆಕ್ಕಿ ತೇಜಸ್‌ ಅವರು ಪೊಲೀಸರಿಗೆ ದೂರು ನೀಡಿದ ಬಳಿಕ ತನಿಖೆ ಚುರುಕುಗೊಂಡಿತು. ಮೊದಲು ಮೊಹಬೂಬ್‌ ನಗರದಲ್ಲಿ ವಿಜಯ್ ಗುರೂಜಿಯನ್ನು ಬಂಧಿಸಿದ ಪೊಲೀಸರು, ತನಿಖೆಯ ವಿಸ್ತರಣೆಯಲ್ಲಿ ಐಷಾರಾಮಿ ಜೀವನ ನಡೆಸುತ್ತಿದ್ದ ಮನೋಜ್‌ ಸುಳಿವನ್ನೂ ಪತ್ತೆ ಹಚ್ಚಿದರು. ಮನೋಜ್–ವಿಜಯ್ ಇಬ್ಬರೂ ಬೆಂಗಳೂರು, ತುಮಕೂರು ಸೇರಿ ಎಂಟು ಟೆಂಟ್‌ಗಳನ್ನು ತೆರೆದು ಜನರನ್ನು ವಂಚಿಸುತ್ತಿದ್ದುದು ಪತ್ತೆಯಾಗಿದೆ.

ಪೊಲೀಸರು ಟೆಕ್ಕಿಯಿಂದ ವಂಚಿಸಿದ್ದ ಮೊತ್ತದಲ್ಲಿ 19.50 ಲಕ್ಷ ರೂ. ವಶಪಡಿಸಿಕೊಂಡಿದ್ದು, ಆರೋಪಿಗಳು ಬಳಸುತ್ತಿದ್ದ ಟಿ.ಟಿ. ವಾಹನವನ್ನು ಕೂಡ ಜಪ್ತಿ ಮಾಡಿದ್ದಾರೆ.

ಘಟನೆಯ ಕುರಿತು ಪ್ರತಿಕ್ರಿಯಿಸಿದ ನಗರ ಪೊಲೀಸ್ ಆಯುಕ್ತ ಸೀಮಂತ್ ಕುಮಾರ್ ಅವರು,

“ವೈದಕೀಯ ಸಮಸ್ಯೆಗೆ ಪರಿಹಾರಕ್ಕಾಗಿ ಅಧಿಕೃತ ಆಸ್ಪತ್ರೆಗಳನ್ನಷ್ಟೇ ಜನರು ಸಂಪರ್ಕಿಸಬೇಕು. ಟೆಂಟ್‌ಗಳಲ್ಲಿ ನಡೆಯುವ ‘ಚಿಕಿತ್ಸೆಗಳು’ ಕಾನೂನುಬಾಹಿರವಾಗಿದ್ದು, ಜೀವಕ್ಕೆ ಅಪಾಯಕಾರಿಯೂ ಆಗಬಹುದು. ದೂರು ಬಂದರೆ ಇಂತಹವರ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಲಾಗುವುದು,” ಎಂದು ಎಚ್ಚರಿಸಿದರು.

ಈ ಪ್ರಕರಣದಲ್ಲಿ ದೂರುದಾರ ತೇಜಸ್‌ಗೆ ನೀಡಲಾದ ನಕಲಿ ಔಷಧಿಗಳು ಶರೀರದ ಅಂಗಾಂಗಗಳಿಗೆ ಹಾನಿ ಮಾಡಿರುವುದಾಗಿ, ಆತನ ಜೀವಕ್ಕೂ ಅಪಾಯ ಉಂಟಾಗುವ ಮಟ್ಟಕ್ಕೆ ಪ್ರಕರಣ ಗಂಭೀರಗೊಂಡಿರುವುದಾಗಿ ಪೊಲೀಸರು ತಿಳಿಸಿದ್ದಾರೆ.

ನಗರದಲ್ಲಿ ಟೆಂಟ್ ಮಾದರಿಯ ಚಿಕಿತ್ಸಾ ಕೇಂದ್ರಗಳ ದಾಖಲಾತಿ ಪರಿಶೀಲನೆ ನಡೆಯಲಿದ್ದು, ಸಾರ್ವಜನಿಕರು ಇಂತಹ ವಂಚಕರ ಬಲೆಗೆ ಸಿಲುಕಬಾರದೆಂದು ಆಯುಕ್ತರು ವಿನಂತಿಸಿದರು.