ಬಾಹ್ಯಾಕಾಶದಲ್ಲಿ ಹೃದಯ ಬಡಿತ ನಿಧಾನವಾಗುತ್ತೆ: ಶುಭಾಂಶು ಶುಕ್ಲಾ | ಬಾಹ್ಯಾಕಾಶ ಪ್ರಯಾಣದ ನೈಜ ಮುಖ ತೆರೆದಿಟ್ಟ ಗಗನಯಾನಿ

ಹೊಸದಿಲ್ಲಿ: ಬಾಹ್ಯಾಕಾಶ ಯಾನವನ್ನು ಸಾಮಾನ್ಯವಾಗಿ ರೋಮಾಂಚಕ ಹಾಗೂ ಕನಸಿನಂತೆ ವರ್ಣಿಸಲಾಗುತ್ತದೆ. ಆದರೆ ಅದಕ್ಕಿಂತಲೂ ಹಿಂದೆ ಅಡಗಿರುವ ಸತ್ಯಗಳನ್ನು ಭಾರತೀಯ ಗಗನಯಾತ್ರಿ ಶುಭಾಂಶು ಶುಕ್ಲಾ ತಮ್ಮ ಅನುಭವಗಳಿಂದ ಬಹಿರಂಗಪಡಿಸಿದರು.

 FICCI CLO ಆಯೋಜಿಸಿದ ಕಾರ್ಯಕ್ರಮದಲ್ಲಿ ಮಾತನಾಡಿದ ಅವರು, ಅಂತರರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣ (ISS) ದಲ್ಲಿನ ಜೀವನವು “ಸ್ಥಿತಿಸ್ಥಾಪಕತೆ, ತಂಡದ ಒಗ್ಗಟ್ಟು ಮತ್ತು ಮಾನವ ಸಹಿಷ್ಣುತೆಯ ಕಠಿಣ ಪರೀಕ್ಷೆ” ಎಂದು ವಿವರಿಸಿದರು.

 “ಬಾಹ್ಯಾಕಾಶ ತಲುಪಿದ ಕ್ಷಣದಿಂದಲೇ ದೇಹ ಬದಲಾಗುತ್ತದೆ. ರಕ್ತವು ತಲೆಗೆ ಹರಿದು ಮುಖ ಊದಿಕೊಳ್ಳುತ್ತದೆ, ಹೃದಯದ ಬಡಿತ ನಿಧಾನಗೊಳ್ಳುತ್ತದೆ, ಬೆನ್ನುಮೂಳೆ ಉದ್ದವಾಗುತ್ತದೆ, ಹೊಟ್ಟೆಯೂ ತೇಲುತ್ತದೆ. ಹಸಿವಾಗುವುದೇ ಇಲ್ಲ. ಇವೆಲ್ಲವೂ ತಕ್ಷಣದ ಬದಲಾವಣೆಗಳು,” ಎಂದು ಶುಕ್ಲಾ ಹೇಳಿದರು.

 ಪ್ರಧಾನಿ ನರೇಂದ್ರ ಮೋದಿಯವರೊಂದಿಗೆ ಸಂವಾದಕ್ಕೂ ಮೊದಲು ತಾವು ವಾಕರಿಕೆ ಮತ್ತು ತಲೆನೋವಿನಿಂದ ಬಳಲಿದ್ದ ಸಂದರ್ಭವನ್ನು ನೆನಪಿಸಿಕೊಂಡ ಅವರು, “ಔಷಧಿ ತೆಗೆದುಕೊಳ್ಳಲಾಗದ ಪರಿಸ್ಥಿತಿಯಲ್ಲೂ ಕೆಲಸ ಮುಂದುವರಿಸಬೇಕಾಗಿತ್ತು. ಆ ಸಮಯದಲ್ಲಿ ಸಹಯಾತ್ರಿಯೊಬ್ಬರು ಮೌನವಾಗಿ ಕ್ಯಾಮೆರಾ ಮತ್ತು ಮೈಕ್ರೊಫೋನ್ ಸರಿಪಡಿಸಿದ ಘಟನೆ ತಂಡದ ಒಗ್ಗಟ್ಟಿನ ನಿದರ್ಶನ,” ಎಂದು ಹೇಳಿದರು.

 ಅವರ ಪ್ರಕಾರ, ಬಾಹ್ಯಾಕಾಶದಲ್ಲಿ ಬದುಕು ಪರಸ್ಪರ ಅವಲಂಬನೆಯ ಸಣ್ಣ ಕಾರ್ಯಗಳಿಂದ ಸಾಗುತ್ತದೆ. “ಫ್ಯಾನ್ ಅನ್ನು ಮುಖದ ಹತ್ತಿರ ತರುವುದು, ಗಂಟೆಗಳ ಕಾಲ ಸಿಕ್ಕಿಬಿದ್ದಾಗ ನೀರಿನ ಬಾಟಲ್ ಹಸ್ತಾಂತರಿಸುವುದು ಇವೆಲ್ಲವೂ ತಂಡದ ಸಹಕಾರದ ಅವಿಭಾಜ್ಯ ಅಂಗಗಳು. ಒಬ್ಬರಿಗೊಬ್ಬರ ಸಹಕಾರ ಇಲ್ಲಿ ಆಯ್ಕೆಯಲ್ಲ, ಅವಶ್ಯಕತೆ,” ಎಂದು ಶುಕ್ಲಾ ಒತ್ತಿಹೇಳಿದರು.

 ದೇಹದ ಅಸ್ವಸ್ಥತೆಯಾಚೆಗೆ ಬಾಹ್ಯಾಕಾಶ ಜೀವನವು ಮನಸ್ಸಿನ ಮೇಲೂ ಆಳವಾದ ಪ್ರಭಾವ ಬೀರುತ್ತದೆ. “ಮೇಲಿನಿಂದ ಭೂಮಿಯನ್ನು ನೋಡುವುದು, ವಿಶೇಷವಾಗಿ ಭಾರತವನ್ನು ಗುರುತಿಸುವುದು ಅಸಾಧಾರಣ ಅನುಭವ. ಕರಾವಳಿ ಹಾಗೂ ಬಯಲು ಪ್ರದೇಶಗಳು ಎದ್ದು ಕಾಣುತ್ತವೆ. ಆ ಕ್ಷಣಗಳಲ್ಲಿ ಮನೆಯೊಂದಿಗಿನ ಸಂಬಂಧ ಅಪಾರವಾಗಿ ನೆನಪಾಗುತ್ತದೆ,” ಎಂದು ಅವರು ಹೇಳಿದರು.

 ಅವರು ಅಮೆರಿಕನ್ ಗಗನಯಾತ್ರಿ ಪೆಗ್ಗಿ ವಿಟ್ಸನ್ ಅವರ ಕಥೆಯನ್ನು ಉಲ್ಲೇಖಿಸಿ, ಪರಿಶ್ರಮದ ಪಾಠವನ್ನೂ ಹಂಚಿಕೊಂಡರು. “ಅವರು 10ನೇ ಬಾರಿ ಅರ್ಜಿ ಸಲ್ಲಿಸಿದಾಗ ಮಾತ್ರ ಆಯ್ಕೆಯಾದರು. ಒಂಭತ್ತು ಬಾರಿ ‘ಇಲ್ಲ’ ಬಂದರೂ, ಒಂದೇ ‘ಹೌದು’ ಇತಿಹಾಸ ಬದಲಾಯಿಸಿತು,” ಎಂದು ಶುಕ್ಲಾ ಪ್ರೇರಣಾದಾಯಕ ಸಂದೇಶ ನೀಡಿದರು.

ಮುಂದಿನ ಗಗನಯಾನ ಮಿಷನ್ ಹಾಗೂ 2040ರೊಳಗೆ ಚಂದ್ರನ ಮೇಲಿನ ಭಾರತ ಪ್ರಸ್ತುತತೆಯು ರಾಷ್ಟ್ರದ ಉತ್ಸಾಹವನ್ನು ಮೇಲ್ದರ್ಜೆಗೆ ಒಯ್ಯುವ ಮೈಲಿಗಲ್ಲುಗಳಾಗಲಿವೆ ಎಂದು ಅವರು ಅಭಿಪ್ರಾಯಪಟ್ಟರು. “ಇದು ಕೇವಲ ರಾಕೆಟ್‌ಗಳ ವಿಷಯವಲ್ಲ, ಇಡೀ ರಾಷ್ಟ್ರದ ಶಕ್ತಿಯ ವಿಚಾರ,” ಎಂದು ಅವರು ಅಭಿಪ್ರಾಯಪಟ್ಟರು.

 “ಕೆಲವರನ್ನು ನಾವು ಬಾಹ್ಯಾಕಾಶಕ್ಕೆ ಕಳುಹಿಸಿದಾಗ, ಲಕ್ಷಾಂತರ ಜನರ ಕನಸುಗಳನ್ನು ನಾವು ಭೂಮಿಯ ಮೇಲೆ ಉತ್ತುತ್ತೇವೆ. ಆಕಾಶ ಎಂದಿಗೂ ಮಿತಿಯಲ್ಲ. ನನಗೂ ಅಲ್ಲ, ನಿಮಗೂ ಅಲ್ಲ, ಭಾರತಕ್ಕೂ ಅಲ್ಲ,” ಎಂದು ಶುಕ್ಲಾ ಹೇಳಿದರು.