ನಕಲಿ ಎಂಜಿನ್‌ ಆಯಿಲ್‌ ಕಾರ್ಖಾನೆ ಪತ್ತೆ ; ಇಬ್ಬರ ಬಂಧನ

ನವದೆಹಲಿ, ಡಿ.12: ದೆಹಲಿಯಲ್ಲಿ ಕಳೆದ ಆರು ತಿಂಗಳಿನಿಂದ ನಿಷೇಧಿತವಾಗಿ ಕಾರ್ಯನಿರ್ವಹಿಸುತ್ತಿದ್ದ ನಕಲಿ ಎಂಜಿನ್‌ ಆಯಿಲ್‌ ತಯಾರಿಕಾ ಘಟಕವನ್ನು ಪೊಲೀಸರು ಭೇದಿಸಿದ್ದಾರೆ. ದೆಹಲಿಯ ಕೆಲವು ಭಾಗಗಳಿಗೆ ನಕಲಿ ಲೂಬ್ರಿಕಂಟ್ ಪೂರೈಸುತ್ತಿದ್ದ ದಂಧೆಯನ್ನು ಪತ್ತೆ ಹಚ್ಚಿದ ಪೊಲೀಸ್ ಇಲಾಖೆ, ಸೋನಿಪತ್‌ನ 27 ವರ್ಷದ ಅಜಯ್ ಭಾರದ್ವಾಜ್ ಮತ್ತು ಜೀವನ್‌ ವಿಹಾರ್‌ನ 22 ವರ್ಷದ ಸಚಿನ್‌ ಶರ್ಮಾ ಎಂಬ ಇಬ್ಬರನ್ನು ಬಂಧಿಸಿದೆ.

ಪೊಲೀಸ್ ಅಧಿಕಾರಿಗಳ ಮಾಹಿತಿಯ ಪ್ರಕಾರ, ಬಂಧಿತರು ಪ್ರಸಿದ್ಧ ಕಂಪನಿಗಳ ಉತ್ಪನ್ನಗಳ ಹೆಸರಿನಲ್ಲಿ ನಕಲಿ ಎಂಜಿನ್ ಆಯಿಲ್ ತಯಾರಿಸಿ ಮಾರುಕಟ್ಟೆಗೆ ಸರಬರಾಜು ಮಾಡುತ್ತಿದ್ದರು. ಘಟಕದಲ್ಲಿ ಇರುವ ಯಂತ್ರೋಪಕರಣಗಳ ನೆರವಿನಿಂದ ದೊಡ್ಡ ಪ್ರಮಾಣದಲ್ಲಿ ನಕಲಿ ಉತ್ಪಾದನೆ ನಡೆಯುತ್ತಿದ್ದುದೂ ತನಿಖೆಯಲ್ಲಿ ಬಹಿರಂಗವಾಗಿದೆ.

ಕಾರ್ಯಾಚರಣೆಯಲ್ಲಿ ವಶಪಡಿಸಿಕೊಂಡ ವಸ್ತುಗಳ ಪ್ರಮಾಣವೇ ದಂಧೆಯ ವ್ಯಾಪಕತೆಯನ್ನು ಬಿಂಬಿಸುತ್ತದೆ. ಒಟ್ಟು 10,060 ಕ್ಯಾಸ್ಟ್ರೋಲ್ ಆಕ್ಟಿವ್ 20W-40 ಎಂಆರ್‌ಪಿ ಸ್ಟಿಕ್ಕರ್‌ಗಳು, 1,160 ಕ್ಯಾಸ್ಟ್ರೋಲ್ GTX 20W-50 ಸ್ಟಿಕ್ಕರ್‌ಗಳು, ಕ್ಯಾಸ್ಟ್ರೋಲ್ ಆಕ್ಟಿವ್ 20W-40ನ 100 ಬಾಟಲಿಗಳು (1 ಲೀಟರ್), ಕ್ಯಾಸ್ಟ್ರೋಲ್ RX ಸೂಪರ್ 15W-40ನ 99 ಬಾಟಲಿಗಳು (1 ಲೀಟರ್) ಹಾಗೂ ಕ್ಯಾಸ್ಟ್ರೋಲ್ CRB Plus 20W-40ನ ನಾಲ್ಕು ಬಕೆಟ್‌ಗಳು (10 ಲೀಟರ್) ಸೇರಿದಂತೆ ಸಾವಿರಾರು ಪ್ಯಾಕೇಜಿಂಗ್‌ ಸಾಮಗ್ರಿಗಳನ್ನು ಪೊಲೀಸರು ಸೀಜ್ ಮಾಡಿದ್ದಾರೆ.

“ಈ ದಂಧೆಗೆ ಇನ್ನೂ ಯಾರು ಯಾರು ಕೈಜೋಡಿಸಿದ್ದಾರೆ, ನಕಲಿ ಆಯಿಲ್ ಮಾರುಕಟ್ಟೆಗೆ ಹೇಗೆ ಪ್ರವೇಶಿಸಿತು ಎಂಬುದರ ಬಗ್ಗೆ ಹೆಚ್ಚಿನ ತನಿಖೆ ಮುಂದುವರಿದಿದೆ,” ಎಂದು ತನಿಖಾಧಿಕಾರಿಗಳು ತಿಳಿಸಿದ್ದಾರೆ.