ರಷ್ಯಾ–ಉಕ್ರೇನ್ ಶಾಂತಿ ಮಾತುಕತೆ ಸ್ಥಗಿತ: ಯುರೋಪ್ ಅಡ್ಡಿಪಡಿಸುತ್ತಿದೆ ಎಂದು ರಷ್ಯಾ ಆರೋಪ

ಮಾಸ್ಕೋ: ರಷ್ಯಾ–ಉಕ್ರೇನ್ ಶಾಂತಿ ಮಾತುಕತೆಗಳು ತಾತ್ಕಾಲಿಕವಾಗಿ ಸ್ಥಗಿತಗೊಂಡಿರುವುದಾಗಿ ಕ್ರೆಮ್ಲಿನ್ ಘೋಷಿಸಿದೆ. ಯುರೋಪಿಯನ್ ರಾಷ್ಟ್ರಗಳು ಸಂವಾದ ಪ್ರಕ್ರಿಯೆಗೆ ಅಡ್ಡಿಯಾಗುತ್ತಿವೆ ಎಂದು ರಷ್ಯಾ ಆರೋಪಿಸಿದ್ದು, ಶಾಂತಿಯುತ ಪರಿಹಾರಕ್ಕೆ ತಾವು ಸಿದ್ಧವಿದ್ದರೂ, ಅಗತ್ಯವಿದ್ದರೆ ಬಲಪ್ರಯೋಗಕ್ಕೂ ಹಿಂಜರಿಯುವುದಿಲ್ಲ ಎಂದು ರಷ್ಯಾ ಅಧ್ಯಕ್ಷ ವ್ಲಾದಿಮಿರ್ ಪುಟಿನ್ ಎಚ್ಚರಿಸಿದ್ದಾರೆ.

ಕ್ರೆಮ್ಲಿನ್ ವಕ್ತಾರ ಡಿಮಿಟ್ರಿ ಪೆಸ್ಕೋವ್ ಸುದ್ದಿಗಾರರಿಗೆ ಮಾತನಾಡುತ್ತಾ, “ಸಂವಹನ ಮಾರ್ಗಗಳು ಇನ್ನೂ ತೆರೆದಿವೆ. ನಮ್ಮ ಸಮಾಲೋಚಕರು ಅವುಗಳ ಮೂಲಕ ಸಂಪರ್ಕದಲ್ಲಿದ್ದಾರೆ. ಆದರೆ ಪ್ರಸ್ತುತ ಮಾತುಕತೆ ವಿರಾಮದಲ್ಲಿದೆ ಎಂದು ಹೇಳುವುದು ಸೂಕ್ತ” ಎಂದು ಸ್ಪಷ್ಟಪಡಿಸಿದರು. ಅವರು, “ರಷ್ಯಾ ಶಾಂತಿಯುತ ಹಾದಿ ಅನುಸರಿಸಲು ಸಿದ್ಧವಾಗಿದೆ. ಆದರೆ ಯುರೋಪಿನ ಹಸ್ತಕ್ಷೇಪವು ಮಾತುಕತೆ ಮುಂದುವರಿಯಲು ಅಡ್ಡಿಯಾಗಿದೆ” ಎಂದು ದೂರಿದರು. SCO ಶೃಂಗಸಭೆಗೂ ಮುನ್ನ ಅಭಿಪ್ರಾಯ ವ್ಯಕ್ತಪಡಿಸಿದ ಪುಟಿನ್, “ಮಾತುಕತೆಗಳ ಮೂಲಕ ಯುದ್ಧ ಅಂತ್ಯಗೊಳ್ಳಲು ಇನ್ನೂ ಅವಕಾಶವಿದೆ” ಎಂದು ಹೇಳಿದರು. ಆದರೆ, ಅಗತ್ಯವಿದ್ದರೆ “ಶಸ್ತ್ರಾಸ್ತ್ರ ಬಲದಿಂದಲೇ ಸಂಘರ್ಷವನ್ನು ಕೊನೆಗೊಳಿಸಲಾಗುತ್ತದೆ” ಎಂದು ಎಚ್ಚರಿಕೆ ನೀಡಿದರು.

ಬೀಜಿಂಗ್‌ನಲ್ಲಿ ಚೀನಾದೊಂದಿಗೆ ಹೊಸ ಅನಿಲ ಪೈಪ್‌ಲೈನ್ ಒಪ್ಪಂದಕ್ಕೆ ಸಹಿ ಹಾಕಿದ ನಂತರ, ಪುಟಿನ್, “ಸುರಂಗದ ಕೊನೆಯಲ್ಲಿ ಬೆಳಕು ಕಾಣುತ್ತಿದೆ” ಎಂದು ಅಭಿಪ್ರಾಯಪಟ್ಟರು. ಮಾಸ್ಕೋದಲ್ಲಿ ಉಕ್ರೇನ್ ಅಧ್ಯಕ್ಷ ವೊಲೊಡಿಮಿರ್ ಝೆಲೆನ್ಸ್ಕಿಯನ್ನು ಭೇಟಿ ಮಾಡಲು ತಾನು ಸಿದ್ಧನಿದ್ದೇನೆ, ಆದರೆ ಮಾತುಕತೆಗಳು ಸಮರ್ಪಕವಾಗಿ ಸಿದ್ಧವಾಗಿದ್ದರೆ ಮತ್ತು ಸ್ಪಷ್ಟ ಫಲಿತಾಂಶ ನೀಡಿದರೆ ಮಾತ್ರ ಎಂದರು. ಉಕ್ರೇನ್ ಈ ಪ್ರಸ್ತಾಪವನ್ನು ತಿರಸ್ಕರಿಸಿದ್ದು, ಉಕ್ರೇನ್ ವಿದೇಶಾಂಗ ಸಚಿವರು ಇದು ಸ್ವೀಕಾರಾರ್ಹವಲ್ಲ ಎಂದು ಪ್ರತಿಕ್ರಿಯಿಸಿದರು. ಈ ನಡುವೆ, ಝೆಲೆನ್ಸ್ಕಿ ಅಮೆರಿಕ ಮತ್ತು ಯುರೋಪಿಯನ್ ಮಿತ್ರ ರಾಷ್ಟ್ರಗಳನ್ನು ರಷ್ಯಾದ ಮೇಲೆ ನಿರ್ಬಂಧಗಳನ್ನು ಬಿಗಿಗೊಳಿಸಲು ಒತ್ತಾಯಿಸಿದ್ದಾರೆ. ಜೊತೆಗೆ, ಪುಟಿನ್ ಅವರೊಂದಿಗೆ ನೇರ ಮಾತುಕತೆಗೆ ಸಿದ್ಧನಾಗಿರುವುದಾಗಿ ಘೋಷಿಸಿದ್ದಾರೆ. ಎರಡು ದೇಶಗಳ ನಡುವೆ ಶಾಂತಿ ಮಾತುಕತೆಗೆ ಮಧ್ಯಸ್ಥಿಕೆ ವಹಿಸಲು ತಾನು ತೊಡಗಿಸಿಕೊಳ್ಳಲು ಸಿದ್ಧನೆಂದು ಘೋಷಿಸಿರುವ ಟ್ರಂಪ್, ಇಬ್ಬರು ನಾಯಕರ ಭೇಟಿಯನ್ನು ಉತ್ತೇಜಿಸಿದ್ದು, ರಾಜತಾಂತ್ರಿಕತೆ ವಿಫಲವಾದಲ್ಲಿ ರಷ್ಯಾದ ವಿರುದ್ಧ ಹೆಚ್ಚುವರಿ ನಿರ್ಬಂಧಗಳನ್ನು ವಿಧಿಸುವ ಎಚ್ಚರಿಕೆ ನೀಡಿದ್ದಾರೆ.