ಪೊಲೀಸರ ಹೆಸರು ಕೆಡಿಸಲು ಅಪಹರಣ ನಾಟಕ; ಮುಂದಾಗಿದ್ದೇನು?

ಲಕ್ನೋ : ಲಕ್ನೋದಲ್ಲಿ ಪೊಲೀಸರಿಗೆ ಕೆಟ್ಟ ಹೆಸರು ತರಲು ಉದ್ದೇಶಪೂರ್ವಕವಾಗಿ ನಕಲಿ ಅಪಹರಣ ನಾಟಕ ರೂಪಿಸಿದ ಕುಟುಂಬ ಹಾಗೂ ಸ್ಥಳೀಯ ರಾಜಕಾರಣಿಯನ್ನು ಪೊಲೀಸರು ಬಂಧಿಸಿರುವ ಘಟನೆ ಬೆಳಕಿಗೆ ಬಂದಿದೆ.

ಸಿಸಿಟಿವಿ ದೃಶ್ಯಗಳು ಮತ್ತು ಕರೆ ದಾಖಲೆಗಳ ವಿಶ್ಲೇಷಣೆ ಬಳಿಕ, ಈ ನಾಟಕವು ಪೊಲೀಸರ ವಿರುದ್ಧ ಅಸಮಾಧಾನ ಮೂಡಿಸಲು ರೂಪಿಸಲಾದ ಸಂಚು ಎಂದು ತನಿಖೆಯಿಂದ ಸ್ಪಷ್ಟವಾಗಿದೆ.

ಗೋಸಾಯಿಗಂಜ್ ಪ್ರದೇಶದ ಸುಭಾಷ್ (22) ತನ್ನ ತಂದೆ ರಾಮ್‌ಕುಮಾರ್ (52) ನ ಸಹಯೋಗದಲ್ಲಿ ಸೆಪ್ಟೆಂಬರ್ 27ರಂದು ಈ ನಕಲಿ ಅಪಹರಣ ನಾಟಕ ಆಯೋಜಿಸಿದ್ದಾನೆ ಎಂದು ಪೊಲೀಸರು ತಿಳಿಸಿದ್ದಾರೆ. ಘಟನೆಯಲ್ಲಿ ಸುಭಾಷ್‌ನ ಸಹೋದರ ಶುಭಂ (19) ಮತ್ತು ಸ್ಥಳೀಯ ರಾಜಕಾರಣಿ ಅಖಿಲೇಶ್ (45) ಭಾಗಿಯಾಗಿದ್ದರು ಎಂದು ತಿಳಿದು ಬಂದಿದೆ.

 ಒಂದು ವಾರದವರೆಗೆ ಸಾಮಾಜಿಕ ಮಾಧ್ಯಮಗಳಲ್ಲಿ ಹಾಗೂ ಸ್ಥಳೀಯ ವಲಯದಲ್ಲಿ "ಪೊಲೀಸರು ನಿರ್ಲಕ್ಷ್ಯ ತೋರಿಸಿದ್ದಾರೆ" ಎಂಬ ಆರೋಪಗಳು ಹರಡಿದ್ದವು. ಆದರೆ ತನಿಖೆಯ ವೇಳೆ ಸಿಸಿಟಿವಿ ದೃಶ್ಯಗಳು ಮತ್ತು ಕರೆ ದಾಖಲೆಗಳು ಬಯಲಿಗೆ ಬಂದು, ಸಂಪೂರ್ಣ ಘಟನೆಯು ಕಟ್ಟುಕಥೆಯಾಗಿದೆ ಎಂದು ಬಹಿರಂಗವಾಯಿತು.

ಪೊಲೀಸರ ಪ್ರಕಾರ, ಸುಭಾಷ್ ಸೆಪ್ಟೆಂಬರ್ 26ರ ರಾತ್ರಿ ಕುಡಿದು ಪೊಲೀಸ್ ಸಹಾಯವಾಣಿ 112 ಗೆ ನಿಂದನಾತ್ಮಕ ಕರೆ ಮಾಡಿದ್ದ. ನಂತರ ಪೊಲೀಸರ ಸೂಚನೆ ಮೇರೆಗೆ ಅವರನ್ನು ಠಾಣೆಗೆ ಕರೆದುಕೊಂಡು ಹೋಗಲಾಯಿತು. ಅಲ್ಲಿ ಬೆಳಗಿನ ಜಾವ 2 ಗಂಟೆ ಸುಮಾರಿಗೆ ಅವನು ಹೊರಟು 20 ನಿಮಿಷಗಳ ನಂತರ ನಿವಾಸದತ್ತ ತೆರಳಿದರೂ, ಬೆಳಿಗ್ಗೆ 3 ಗಂಟೆಗೆ ಅವರ ತಂದೆ "ಮಗ ಕಾಣೆಯಾಗಿದ್ದಾನೆ" ಎಂದು ಕರೆಮಾಡಿ ಪೊಲೀಸರನ್ನು ಆರೋಪಿಸಿದ್ದರು.

ಬೆಳಿಗ್ಗೆ ಕುಟುಂಬದ ಸದಸ್ಯರು ಮತ್ತು ಸ್ಥಳೀಯ ರಾಜಕಾರಣಿಗಳು ಸಾಮಾಜಿಕ ಮಾಧ್ಯಮದ ಮೂಲಕ ಅಪಹರಣದ ಆರೋಪಗಳನ್ನು ಪ್ರಚಾರ ಮಾಡಿದರು. ಪರಿಣಾಮವಾಗಿ ಪೊಲೀಸರು ತುರ್ತು ಕ್ರಮ ಕೈಗೊಂಡು ತನಿಖೆಗೆ ಐದು ತಂಡಗಳನ್ನು ನಿಯೋಜಿಸಿದರು. ಆದರೆ, 200 ಕ್ಕೂ ಹೆಚ್ಚು ಸಿಸಿಟಿವಿ ದೃಶ್ಯಾವಳಿ ಮತ್ತು ಮೊಬೈಲ್ ಸ್ಥಳ ವಿವರಗಳನ್ನು ಪರಿಶೀಲಿಸಿದ ಬಳಿಕ, ಸುಭಾಷ್ ಯಾವುದೇ ಅಪಾಯದಲ್ಲಿರಲಿಲ್ಲ ಎಂಬುದು ಪತ್ತೆಯಾಯಿತು. ಆತ ಸ್ಥಳ ಬದಲಾಯಿಸುತ್ತಾ ವಿವಿಧ ಸಂಖ್ಯೆಗಳ ಮೂಲಕ ಸಂಪರ್ಕಿಸುತ್ತಿದ್ದ ಎಂಬುದೂ ಬೆಳಕಿಗೆ ಬಂತು.

 ತನಿಖೆಯ ಬಳಿಕ, ಪೊಲೀಸರು ರಾಮ್‌ಕುಮಾರ್, ಸುಭಾಷ್, ಶುಭಂ ಮತ್ತು ಅಖಿಲೇಶ್ ಅವರನ್ನು ಬಂಧಿಸಿದ್ದಾರೆ. ಆರೋಪಿಗಳ ವಿರುದ್ಧ ಭಾರತೀಯ ದಂಡ ಸಂಹಿತೆಯ ಸೆಕ್ಷನ್ 308(6) (ಸುಳ್ಳು ಆರೋಪದ ಮೂಲಕ ಸುಲಿಗೆ) ಮತ್ತು 248A (ಗಾಯಗೊಳಿಸುವ ಉದ್ದೇಶದಿಂದ ಸುಳ್ಳು ಆರೋಪ) ಅಡಿಯಲ್ಲಿ ಪ್ರಕರಣ ದಾಖಲಾಗಿದೆ. ಕುಟುಂಬದ ವಿರುದ್ಧ ಹಿಂದೆಯೂ 208, 323, 504 ಮತ್ತು 506 ಸೆಕ್ಷನ್‌ಗಳ ಅಡಿಯಲ್ಲಿ ಕ್ರಿಮಿನಲ್ ಪ್ರಕರಣಗಳ ದಾಖಲೆಗಳಿವೆ ಎಂದು ಪೊಲೀಸರು ತಿಳಿಸಿದ್ದಾರೆ.

 “ಸುಳ್ಳು ಕಥೆಗಳಿಂದ ಅಮೂಲ್ಯ ಪೊಲೀಸ್ ಸಂಪನ್ಮೂಲಗಳು ವ್ಯರ್ಥವಾಗುತ್ತಿವೆ. ನಿಜವಾಗಿ ಸಹಾಯ ಅಗತ್ಯವಿರುವವರಿಗಾಗಿ ಬಳಸಬೇಕಾದ ಸಮಯ ಇಂತಹ ನಾಟಕಗಳಲ್ಲಿ ಕಳೆದುಹೋಗುತ್ತಿದೆ,” ಎಂದು ಸಹಾಯಕ ಪೊಲೀಸ್ ಆಯುಕ್ತ (ಗೋಸಾಯಿಗಂಜ್) ರಿಷಭ್ ರನ್ವಾಲ್ ವಿಷಾದ ವ್ಯಕ್ತಪಡಿಸಿದರು.

 “ದಸರಾ ಹಬ್ಬದ ಸಮಯದಲ್ಲಿ ಈ ಪ್ರಕರಣಕ್ಕೆ 15 ಸಿಬ್ಬಂದಿ ಒಳಗೊಂಡ ಐದು ತನಿಖಾ ತಂಡಗಳನ್ನು ನಿಯೋಜಿಸಬೇಕಾಯಿತು. ಈ ರೀತಿಯ ನಕಲಿ ಪ್ರಕರಣಗಳು ಪೊಲೀಸರ ಶ್ರಮ ಮತ್ತು ಸಾರ್ವಜನಿಕ ಸಂಪನ್ಮೂಲಗಳ ನಷ್ಟಕ್ಕೆ ಕಾರಣವಾಗುತ್ತವೆ,” ಎಂದು ಹೇಳಿದರು.