ರಾತ್ರಿ ಮನೆಯಲ್ಲಿ ಯುವತಿಯರಿಗೆ ಉಳಿದುಕೊಳ್ಳಲು ಅವಕಾಶ ನೀಡಿದ ಆರೋಪ: ಯುವಕನಿಗೆ ಹೌಸಿಂಗ್ ಸೊಸೈಟಿಯಿಂದ ₹5,000 ದಂಡ

ಬೆಂಗಳೂರು, ಡಿ. 04: ನಗರದ ಖಾಸಗಿ ಅಪಾರ್ಟ್‌ಮೆಂಟ್‌ ಸಮುಚ್ಚಯದಲ್ಲಿ ಯುವತಿಯರನ್ನು ರಾತ್ರಿ ಉಳಿದುಕೊಳ್ಳಲು ಅವಕಾಶ ನೀಡಿದ್ದಕ್ಕಾಗಿಟ ಯುವಕನೊಬ್ಬರಿಗೆ ₹5,000 ದಂಡ ವಿಧಿಸಿರುವ ಘಟನೆ ಸೋಶಿಯಲ್ ಮೀಡಿಯಾದಲ್ಲಿ ವ್ಯಾಪಕ ಚರ್ಚೆಗೆ ಕಾರಣವಾಗಿದೆ. ಇಬ್ಬರು ಯುವತಿಯರು ತಮ್ಮ ಫ್ಲಾಟ್‌ನಲ್ಲಿ ರಾತ್ರಿಯಿಡೀ ಇದ್ದರು ಎಂಬ ಕಾರಣಕ್ಕೆ ವಸತಿ ಸಂಘದ ಈ ಕ್ರಮ ಕೈಗೊಂಡಿದೆ ಎನ್ನಲಾಗಿದೆ.

r/bengaluru ಹೆಸರಿನ ರೆಡ್ಡಿಟ್ ಫೋರಮ್‌ನಲ್ಲಿ ಯುವಕ ದಂಡದ ಬಿಲ್‌ ಸ್ಕ್ರೀನ್‌ಶಾಟ್‌ ಜತೆ ಘಟನೆ ವಿವರಗಳನ್ನು ಹಂಚಿಕೊಂಡಿದ್ದಾರೆ. “ನಮ್ಮ ಸೊಸೈಟಿಯಲ್ಲಿ ಬ್ಯಾಚುಲರ್ ನಿವಾಸಿಗಳು ರಾತ್ರಿ ಅತಿಥಿಗಳನ್ನು ಉಳಿಸಿಕೊಳ್ಳಬಾರದು ಎಂಬ ನಿಯಮವಿದೆ. ಕುಟುಂಬಗಳಿಗೆ ಮಾತ್ರ ವಿನಾಯಿತಿ ನೀಡಲಾಗಿದೆ. ಯಾವುದೇ ಪೂರ್ವ ಎಚ್ಚರಿಕೆ ನೀಡದೇ ನೇರವಾಗಿ ದಂಡ ವಿಧಿಸಿರುವುದು ಅಸಂಗತ,” ಎಂದು ಅವರು ಪೋಸ್ಟ್‌ನಲ್ಲಿ ಹೇಳಿದ್ದಾರೆ.

“ನಾವು ವೆಚ್ಚ ಪಾವತಿಸುವ ನಿವಾಸಿಗಳೇ. ಇದು ಮೊದಲ ಉಲ್ಲಂಘನೆ ಆಗಿದ್ದರೂ, ದಂಡ ವಿಧಿಸುವ ಮೊದಲು ಆಡಳಿತ ಸಮಿತಿಯಿಂದ ಯಾವುದೇ ಮಾಹಿತಿ ಬಂದಿಲ್ಲ. ಕಾನೂನು ಕ್ರಮ ಕೈಗೊಳ್ಳುವ ಅವಕಾಶ ಇಲ್ಲದಿದ್ದರೂ, ನಿಯಮದ ಮರುಪರಿಶೀಲನೆಗಾಗಿ ಯಾವ ಮಾರ್ಗ ಬಳಸಬಹುದು ಎಂಬುದು ಪ್ರಶ್ನೆಯಾಗಿದೆ,” ಎಂದು ಅವರು ತಿಳಿಸಿದ್ದಾರೆ.

ಈ ಪೋಸ್ಟ್‌ ವೈರಲ್‌ ಆದ ನಂತರ ಅನೇಕ ಬಳಕೆದಾರರು ತಮ್ಮ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ. ಕೆಲವರು “ನ್ಯಾಯಾಲಯದ ಮೂಲಕ ಪ್ರಶ್ನಿಸಬಹುದು” ಎಂದು ಸಲಹೆ ನೀಡಿದ್ದರೆ, ಮತ್ತೊಬ್ಬರು “ಸೊಸೈಟಿ ತನ್ನನ್ನು ಹೋಟೆಲ್ ವ್ಯವಸ್ಥೆಯಂತೆ ನಡೆಸಿಕೊಳ್ಳುತ್ತಿದೆ” ಎಂದು ಟೀಕಿಸಿದ್ದಾರೆ. 

ಕೂಡಲೇ ಪ್ರತಿಕ್ರಿಯಿಸಿದ ಕೆಲವರು, “ಇಂತಹ ವಿಷಯಗಳಲ್ಲಿ ವಾದವಿವಾದ ಮಾಡುವುದರಿಂದ ಫಲವಿಲ್ಲ; ಸಮಯ ಮತ್ತು ಹಣ ವ್ಯರ್ಥವಾಗಬಹುದು” ಎಂದು ಅಭಿಪ್ರಾಯಪಟ್ಟಿದ್ದಾರೆ.