ಕಾನ್ಪುರ: ಮ್ಯಾಗಿ ಖರೀದಿಸಲು ಸಹೋದರಿಯ ನಿಶ್ಚಿತಾರ್ಥದ ಉಂಗುರ ಮಾರಲು ಬಂದ 13 ವರ್ಷದ ಬಾಲಕ!

ಕಾನ್ಪುರ: ಕಾನ್ಪುರದ ಶಾಸ್ತ್ರಿ ನಗರದಲ್ಲಿ ನಡೆದ ವಿಚಿತ್ರವಾದರೂ ಹೃದಯಸ್ಪರ್ಶಿ ಘಟನೆ ಸಾಮಾಜಿಕ ಮಾಧ್ಯಮಗಳಲ್ಲಿ ವ್ಯಾಪಕ ಚರ್ಚೆಗೆ ಕಾರಣವಾಗಿದೆ. ಕೇವಲ ಮ್ಯಾಗಿ ನೂಡಲ್ಸ್ ಖರೀದಿಸಲು 13 ವರ್ಷದ ಬಾಲಕನೊಬ್ಬ ತನ್ನ ಸಹೋದರಿಯ ನಿಶ್ಚಿತಾರ್ಥದ ಚಿನ್ನದ ಉಂಗುರವನ್ನು ಮಾರಲು ಯತ್ನಿಸಿದ ಘಟನೆ ಎಲ್ಲರನ್ನೂ ಅಚ್ಚರಿಗೊಳಿಸಿದೆ.

ವರದಿಗಳ ಪ್ರಕಾರ, ಬಾಲಕ ಶಾಸ್ತ್ರಿ ನಗರದಲ್ಲಿನ ಪುಷ್ಪೇಂದ್ರ ಜೈಸ್ವಾಲ್ ಎಂಬ ಆಭರಣ ವ್ಯಾಪಾರಿಯ ಅಂಗಡಿಗೆ ಬಂದು ಚಿನ್ನದ ಉಂಗುರವನ್ನು ಮಾರುವುದಕ್ಕೆ ನೀಡಿದ್ದಾನೆ. ವ್ಯಾಪಾರಿಯು ಕುತೂಹಲದಿಂದ ಪ್ರಶ್ನಿಸಿದಾಗ ಬಾಲಕ “ಮ್ಯಾಗಿ ಖರೀದಿಸಲು ಹಣ ಬೇಕು” ಎಂದು ಉತ್ತರಿಸಿದ್ದಾನೆ.

 ಬಾಲಕನ ಉತ್ತರದಿಂದ ಸಂಶಯಗೊಂಡ ಜೈಸ್ವಾಲ್ ಅವರು ತಕ್ಷಣ ಪರಿಸ್ಥಿತಿಯನ್ನು ಅರಿತುಕೊಂಡು ಹುಡುಗನ ತಾಯಿಯನ್ನು ಸಂಪರ್ಕಿಸಿದ್ದಾರೆ. ಕೆಲವೇ ಕ್ಷಣಗಳಲ್ಲಿ ತಾಯಿ ಅಂಗಡಿಗೆ ಬಂದು ಉಂಗುರವನ್ನು ನೋಡುತ್ತಿದ್ದಂತೆಯೇ ಕಣ್ಣೀರಿಟ್ಟು ಅದೇ ತನ್ನ ಮಗಳ ನಿಶ್ಚಿತಾರ್ಥದ ಉಂಗುರ ಎಂದು ದೃಢಪಡಿಸಿದ್ದಾರೆ.

ಅಂಗಡಿ ಮಾಲೀಕರು ಯಾವುದೇ ವ್ಯವಹಾರ ಮಾಡದೆ ಉಂಗುರವನ್ನು ತಾಯಿಗೆ ಹಿಂತಿರುಗಿಸಿದರು. ತಾಯಿ ಕಣ್ಣೀರಿಟ್ಟು ಕೃತಜ್ಞತೆಯನ್ನು ವ್ಯಕ್ತಪಡಿಸಿದರು. ಅವರ ಹೇಳಿಕೆಯ ಪ್ರಕಾರ, ಮಗಳ ಮದುವೆ ಇನ್ನೇನು ಕೆಲವು ದಿನಗಳಲ್ಲಿ ನಡೆಯಲಿದ್ದು, ಉಂಗುರ ಕಳೆದುಹೋದರೆ ಅದು ಕುಟುಂಬಕ್ಕೆ ದೊಡ್ಡ ಆಘಾತವಾಗುತ್ತಿತ್ತು.

 ಪುಷ್ಪೇಂದ್ರ ಜೈಸ್ವಾಲ್ ಅವರು “ನಮ್ಮ ಮಾರುಕಟ್ಟೆಯಲ್ಲಿ ಅಪ್ರಾಪ್ತ ವಯಸ್ಕರು ತಂದ ವಸ್ತುಗಳನ್ನು ಪರಿಶೀಲನೆಯಿಲ್ಲದೆ ಯಾವುದೇ ಅಂಗಡಿ ಖರೀದಿಸುವುದಿಲ್ಲ” ಎಂದು ಹೇಳಿದರು.

 ಘಟನೆ ಸಾಮಾಜಿಕ ಮಾಧ್ಯಮಗಳಲ್ಲಿ ವೇಗವಾಗಿ ಹರಡಿದ್ದು, ವ್ಯಾಪಾರಿಯ ಪ್ರಾಮಾಣಿಕತೆಗೆ ನೂರಾರು ಜನರು ಪ್ರಶಂಸೆ ವ್ಯಕ್ತಪಡಿಸಿದ್ದಾರೆ. ಅನೇಕರು ಈ ಘಟನೆಯನ್ನು ದಯೆ, ಜವಾಬ್ದಾರಿ ಮತ್ತು ಮಕ್ಕಳ ಮುಗ್ಧ ಆಸೆಗಳನ್ನು ಅರಿತುಕೊಳ್ಳುವ ಪ್ರೇರಣಾದಾಯಕ ಉದಾಹರಣೆ ಎಂದು ಶ್ಲಾಘಿಸಿದ್ದಾರೆ.