ಪಾನಿಪುರಿ ವಿವಾದ; ರಸ್ತೆ ತಡೆ ನಡೆಸಿದ ಮಹಿಳೆ! ಎರಡು ಪಾನಿಪುರಿ ಕಡಿಮೆ ಕೊಟ್ಟಿದ್ದಾನೆ ಎಂದು ಅಳಲು

 ವಡೋದರಾ: ಸಾಮಾನ್ಯವಾಗಿ ಮೆರವಣಿಗೆಗಳು, ರಾಜಕೀಯ ರ‍್ಯಾಲಿಗಳು ಅಥವಾ ಮಳೆಯಿಂದ ಸಂಚಾರಕ್ಕೆ ತೊಂದರೆ ಉಂಟಾಗುತ್ತದೆ. ಆದರೆ ಈ ವಾರ, ವಡೋದರಾ ನಗರದಲ್ಲಿ ಗೋಲ್ಗಪ್ಪಗಳೇ ಟ್ರಾಫಿಕ್ ಅಡಚಣೆಗೆ ಕಾರಣವಾದವು!

ಸುರಸಾಗರ್ ಸರೋವರದ ಬಳಿಯಲ್ಲಿ ಮಹಿಳೆಯೊಬ್ಬರು ರಸ್ತೆ ಮಧ್ಯೆ ಕುಳಿತು ಪ್ರತಿಭಟನೆ ನಡೆಸಿದರು. ತಮಗೆ 20 ರೂಪಾಯಿಗೆ ಆರು ಗೋಲ್ಗಪ್ಪ ಸಿಗಬೇಕು ಎಂದು ನಿರೀಕ್ಷಿಸಿದ್ದರೂ, ಮಾರಾಟಗಾರ ಕೇವಲ ನಾಲ್ಕು ಮಾತ್ರ ಕೊಟ್ಟಿದ್ದಾನೆ ಎಂದು ಆಕೆ ಆಕ್ರೋಶ ವ್ಯಕ್ತಪಡಿಸಿದರು.

"ಇನ್ನೂ ಎರಡು ಪೂರಿ ಬೇಕು" ಎಂಬ ಬೇಡಿಕೆ ಈಡೇರದವರೆಗೆ ರಸ್ತೆಯ ಮಧ್ಯದಲ್ಲಿ ಕುಳಿತುಕೊಂಡ ಮಹಿಳೆ ಅಲ್ಲಿಂದ ಏಳಲು ನಿರಾಕರಿಸಿದರು. ವಾಹನ ಚಾಲಕರು ಎಚ್ಚರಿಕೆಯಿಂದ ಆಕೆಯ ಸುತ್ತಲೂ ತಿರುಗಿ ವಾಹನದಲ್ಲಿ ಹೋಗುತ್ತಿದ್ದರು, ಕೆಲವರು ಈ ದೃಶ್ಯವನ್ನು ತಮ್ಮ ಫೋನ್‌ಗಳಲ್ಲಿ ಸೆರೆಹಿಡಿದರು.

ಸ್ಥಳಕ್ಕೆ ಬಂದ ಪೊಲೀಸರು ಮಧ್ಯಪ್ರವೇಶಿಸಲು ಯತ್ನಿಸಿದಾಗ ಮಹಿಳೆ ಇನ್ನಷ್ಟು ಕಣ್ಣೀರಿಟ್ಟರು. "20 ರೂಪಾಯಿಗೆ ಆರು ಪೂರಿ ಸಿಗಬೇಕು, ಅದಕ್ಕಿಂತ ಕಡಿಮೆ ಬೇಡ" ಎಂದು ಆಕೆ ಪಟ್ಟು ಹಿಡಿದರು.

 ಈ ಚಿಕ್ಕ ವಿಚಾರವೇ ಹಲವಾರು ಗಂಟೆಗಳ ಕಾಲ ಸಂಚಾರವನ್ನು ಸ್ಥಗಿತಗೊಳಿಸಿತು. ಕೊನೆಗೆ ಪೊಲೀಸರು ಮಹಿಳೆಯನ್ನು ಸ್ಥಳದಿಂದ ಕರೆದುಕೊಂಡು ಹೋಗಿ ಆಕೆಗೆ ಪಾನಿಪುರಿ ಕೊಡಿಸಿದರು!