ಲಕ್ಸುರಿ ಲೈಫ್‌ಗಾಗಿ ಮನೆಗಳ್ಳತನ; ಗೆಳತಿಯೊಂದಿಗೆ ಲಿವಿಂಗ್ ಟುಗೆದರ್ ನಡೆಸುತ್ತಿದ್ದ ವ್ಯಕ್ತಿ ಸೆರೆ

ಕಲಬುರಗಿ: ಪೊಲೀಸರು ಗೆಳತಿಯೊಂದಿಗೆ ಲಿವಿಂಗ್ ಟುಗೆದರ್ ನಡೆಸಲು ಮತ್ತು ಇಬ್ಬರ ಶೋಕಿ ಬದುಕನ್ನು ಮುಂದುವರಿಸಲು ಮನೆಗಳ್ಳತನ ಹಾಗೂ ಸುಲಿಗೆ ನಡೆಸುತ್ತಿದ್ದ ಯುವಕನನ್ನು ಬಂಧಿಸಿದ್ದಾರೆ. ಕೂಲಿ ಕೆಲಸದಿಂದ ಸಿಗುವ ಆದಾಯವು ತನ್ನ ಹಾಗೂ ಗೆಳತಿಯ ಖರ್ಚಿಗೆ ಸಾಲದಿದ್ದಾಗ ಕಳ್ಳತನದ ದಾರಿಗೆ ಕಾಲಿಟ್ಟಿರುವುದು ತನಿಖೆಯಲ್ಲಿ ಬಹಿರಂಗವಾಗಿದೆ.

ಬಂಧಿತನಾಗಿ ಗುರುತಿಸಲ್ಪಟ್ಟಿರುವವರು ಅಫಜಲಪುರದ ಕಲ್ಲಪ್ಪ ಅಲಿಯಾಸ್ ಸಂಜು ಪೂಜಾರಿ (24). ಗೆಳತಿಯೊಂದಿಗೆ ಲಿವಿಂಗ್ ಟುಗೆದರ್ ಜೀವನ ನಡೆಸುತ್ತಿದ್ದ ಈತನ ಖರ್ಚು ಜಾಸ್ತಿಯಾದಂತೆ ಮೊದಲು ಸಣ್ಣ ಕಳ್ಳತನ, ನಂತರ ಮನೆಗಳ್ಳತನ ಮಾಡಿ ದುಡ್ಡು ಸಂಗ್ರಹಿಸುತ್ತಿದ್ದ ಎಂದು ನಗರ ಪೊಲೀಸ್ ಆಯುಕ್ತ ಶರಣಪ್ಪ ಎಸ್‌.ಡಿ ಮಾಹಿತಿ ನೀಡಿದರು.

ವಿಶ್ವವಿದ್ಯಾಲಯ ಠಾಣೆ ಪೊಲೀಸರು ನಡೆಸಿದ ಭರ್ಜರಿ ಕ್ರಮದಲ್ಲಿ ಕಲ್ಲಪ್ಪ ಹಾಗೂ ವಿಜಯಪುರ ಮೂಲದ ಸಂತೋಷ್ ಪೂಜಾರಿ (30) ಎಂಬ ಕುಖ್ಯಾತ ಸುಲಿಗೆಕೋರರನ್ನು ಬಂಧಿಸುವಲ್ಲಿ ಯಶಸ್ವಿಯಾಗಿದ್ದಾರೆ. ಬಂಧಿತರಿಂದ ₹7.62 ಲಕ್ಷ ಮೌಲ್ಯದ 61 ಗ್ರಾಂ ಚಿನ್ನ, 680 ಗ್ರಾಂ ಬೆಳ್ಳಿ ಆಭರಣಗಳು ವಶಪಡಿಸಿಕೊಳ್ಳಲಾಗಿದೆ.

ನವೆಂಬರ್ 22ರಂದು ಕೂಲಿ ಕೆಲಸ ಹೇಳಿ, ಸುನಿತಾ ಎಂಬ ಮಹಿಳೆಯನ್ನು ನಿರ್ಜನ ಪ್ರದೇಶಕ್ಕೆ ಕರೆದುಕೊಂಡು ಹೋಗಿ, ಆಕೆಯ ಕೊರಳಲ್ಲಿದ್ದ 3 ಗ್ರಾಂ ಚಿನ್ನದ ಮಂಗಳಸೂತ್ರವನ್ನು ಕಿತ್ತುಕೊಂಡು ಆರೋಪಿ ಪರಾರಿಯಾಗಿದ್ದನು. ಈ ಪ್ರಕರಣವನ್ನು ದಾಖಲಿಸಿಕೊಂಡ ವಿಶ್ವವಿದ್ಯಾಲಯ ಠಾಣೆಯ ಇನ್ಸ್‌ಪೆಕ್ಟರ್ ಚಂದ್ರಶೇಖರ ತಿಗಡಿ ಅವರ ತಂಡ ಆರೋಪಿಗಳನ್ನು ಬಂಧಿಸಿದೆ.

ವಿಚಾರಣೆಯಲ್ಲಿ ಆರೋಪಿ ಕಲ್ಲಪ್ಪ ಐದು ಮನೆಗಳ್ಳತನ ಮತ್ತು ಒಂದು ಸುಲಿಗೆ ಪ್ರಕರಣದಲ್ಲಿ ಭಾಗಿಯಾಗಿರುವುದು ಬೆಳಕಿಗೆ ಬಂದಿದೆ. ಸಂತೋಷ್ ವಿರುದ್ಧವೂ ಒಂದು ಸುಲಿಗೆ ಪ್ರಕರಣ ದಾಖಲಾಗಿದೆ.

ಮಹಿಳೆಯರಿಗೆ ’ಕೂಲಿ ಕೆಲಸ ಇದೆ’ ಎಂದು ನಂಬಿಕೆ ಮೂಡಿಸಿ ಆಟೋದಲ್ಲಿ ಕರೆದೊಯ್ದು, ಅವರ ಚಿನ್ನದ ಆಭರಣ ದೋಚಿ ಪರಾರಿಯಾಗುತ್ತಿದ್ದ ಆರೋಪಿಗಳ ಕೃತ್ಯವನ್ನು ಪೊಲೀಸರು ಬಯಲಿಗೆಳೆದಿದ್ದಾರೆ ಎಂದು ಆಯುಕ್ತರು ತಿಳಿಸಿದ್ದಾರೆ.