ದೇಗುಲದ ಹುಂಡಿಯಲ್ಲಿ ಲವ್ ಲೆಟರ್, ಪ್ರೇಮಿಗಳ ಫೋಟೋ! : ‘ಪ್ರೀತಿಸಿದ ಹುಡುಗಿ ಸಿಗಲಿ’ ಎಂದು ಭಕ್ತನ ಬೇಡಿಕೆ
admincoorgdaily
ಚಿಕ್ಕಬಳ್ಳಾಪುರ, ಡಿ. 3: ನಂದಿ ಗಿರಿಧಾಮದ ತಪ್ಪಲಿನಲ್ಲಿ ನೆಲಸಿರುವ ಭೋಗನಂದೀಶ್ವರ ದೇವಾಲಯದ ಹುಂಡಿ ಎಣಿಕೆ ವೇಳೆ ಈ ಬಾರಿ ವಿಚಿತ್ರ ವಿಚಿತ್ರ ಚೀಟಿಗಳು ಬೆಳಕಿಗೆ ಬಂದಿವೆ. ಕಾಣಿಕೆ ಹಣದ ಜತೆಗೆ ಲವ್ ಲೆಟರ್, ಪ್ರೇಮಿಗಳ ಫೋಟೋ ಹಾಗೂ ವೈಯಕ್ತಿಕ ಬೇಡಿಕೆ ಪತ್ರಗಳು ಪತ್ತೆಯಾಗಿದೆ.
ಆಡಳಿತ ಮಂಡಳಿ ನಡೆಸಿದ ಎಣಿಕೆಯಲ್ಲಿ ಸುಮಾರು 15 ಲಕ್ಷ ರೂ. ಕಾಣಿಕೆ ದಾಖಲಾಗಿದ್ದು, ಅದರಲ್ಲಿ ಅನೇಕ ಮನವಿ ಪತ್ರಗಳು ಸೇರಿವೆ. ಮಹಿಳೆಯೊಬ್ಬರ ಫೋಟೋ ಹಿಂದುಗಡೆಯಲ್ಲಿ “ಪದ್ಮಾ, ಮತ್ತೆ ತಿರುಗಿಬಾ” ಎಂಬ ಬರಹ; ಮತ್ತೊಂದು ಚೀಟಿಯಲ್ಲಿ ಯುವಕನ ಮನವಿ ಕಂಡು ಬಂದಿದೆ.
“ನಾನು ಪ್ರೀತಿಸುವ ಹುಡುಗಿಯ ತಂದೆ-ತಾಯಿ ನಮ್ಮ ಸಂಬಂಧಕ್ಕೆ ಒಪ್ಪಲಿ. ಅವಳಿಗೆ ಯಾವ ತೊಂದರೆಯೂ ಆಗದಂತೆ ನೋಡಿಕೊಳ್ಳುತ್ತೇನೆ. ನಮ್ಮ ಪ್ರೇಮಕ್ಕೆ ಆಶೀರ್ವಾದ ಮಾಡು ಭಗವಂತ” ಎಂದು ಬರೆದಿರುವುದು ಕಂಡು ಬಂದಿದೆ.
ಕುಟುಂಬ ಕಲ್ಯಾಣಕ್ಕೆ ಸಂಬಂಧಿಸಿದ ಬೇಡಿಕೆಗಳೂ ಕಂಡುಬಂದಿವೆ. “ನನ್ನ ಗಂಡನಿಗೆ ಒಳ್ಳೆಯ ಕೆಲಸ ಸಿಗಲಿ; ನನ್ನ ಮಗ ಓದಿನಲ್ಲಿ ಮುಂದುವರಿಯಲಿ” ಎನ್ನಿರುವ ಬೇಡಿಕೆಯ ಚೀಟಿ ಕೂಡ ಹುಂಡಿಯಲ್ಲಿ ಪತ್ತೆಯಾಗಿದೆ.
ಈ ಬಗ್ಗೆ ಪ್ರತಿಕ್ರಿಯಿಸಿದ ದೇವಾಲಯದ ಕಾರ್ಯನಿರ್ವಹಣಾ ಅಧಿಕಾರಿ ರುಕ್ಮಿಣಿ,
“ಕಾಣಿಕೆಯ ಜೊತೆಗೆ ಕೆಲವು ಭಕ್ತರು ತಮ್ಮ ಮನದ ಮಾತನ್ನೂ ಚೀಟಿಯಲ್ಲಿ ಬರೆದು ಅರ್ಪಿಸಿದ್ದಾರೆ. ನಮಗೆ ಅಸಾಮಾನ್ಯವಾಗಿಸಿಕೊಂಡರೂ ಅವರ ಪಾಲಿಗೆ ಅದು ಮಹತ್ವದ ಮನವಿ. ಹುಂಡಿಯಲ್ಲಿ ಸಿಕ್ಕ ಎಲ್ಲ ಪತ್ರಗಳನ್ನು ಸಂಗ್ರಹಿಸಿದ್ದೇವೆ. ಸ್ವಲ್ಪ ಪ್ರಮಾಣದ ಚಿನ್ನ-ಬೆಳ್ಳಿಯ ವಸ್ತುಗಳೂ ಸಿಕ್ಕಿವೆ” ಎಂದು ಹೇಳಿದರು.
