ಬೆಂಗಳೂರಿನಲ್ಲಿ ನಿವೃತ್ತ ಹಿರಿಯ ವ್ಯಕ್ತಿಗೆ 14 ದಿನಗಳ ‘ಡಿಜಿಟಲ್ ಅರೆಸ್ಟ್'; ₹1.62 ಕೋಟಿ ಸೈಬರ್ ವಂಚನೆ

ಬೆಂಗಳೂರು, ಅ. 21: 66 ವರ್ಷದ ನಿವೃತ್ತ ವ್ಯಕ್ತಿಯೊಬ್ಬರನ್ನು ಪೊಲೀಸ್ ಅಧಿಕಾರಿಗಳ ಸೋಗಿನಲ್ಲಿ ಕರೆಮಾಡಿ, ಮಾನವ ಕಳ್ಳಸಾಗಣೆ ಆರೋಪದ ಹೆಸರಿನಲ್ಲಿ 14 ದಿನಗಳ ಕಾಲ ‘ಡಿಜಿಟಲ್ ಅರೆಸ್ಟ್’ದಲ್ಲಿರಿಸಿ ₹1.62 ಕೋಟಿ ವಂಚಿಸಿರುವ ಘಟನೆ ನಡೆದಿದೆ.

 ಸೆಪ್ಟೆಂಬರ್ 27ರಂದು ಮಧ್ಯಾಹ್ನ 2.30ರ ಸುಮಾರಿಗೆ ವಂಚಕನೊಬ್ಬ ಮುಂಬೈ ಪೊಲೀಸ್ ಇಲಾಖೆಯ ಅಧಿಕಾರಿಯಾಗಿದ್ದಾಗಿ ಕರೆಮಾಡಿ, “ಮುಂಬೈನ ಐಷಾರಾಮಿ ಹೋಟೆಲ್‌ನಲ್ಲಿ ನಡೆದ ದಾಳಿಯಲ್ಲಿ ನಿಮ್ಮ ಹೆಸರಿನ ದಾಖಲೆಗಳು ಪತ್ತೆಯಾಗಿದೆ” ಎಂದು ಹೇಳಿದ್ದಾರೆ. ಬಳಿಕ ವೀಡಿಯೊ ಕಾಲ್ ಮೂಲಕ ತನ್ನನ್ನು “ಸೈಬರ್ ಅಪರಾಧ ಇನ್ಸ್‌ಪೆಕ್ಟರ್ ಕುಡ್ಲಿಪ್ ಸಿಂಗ್” ಎಂದು ಪರಿಚಯಿಸಿಕೊಂಡು, ಪೊಲೀಸ್ ಸಮವಸ್ತ್ರ ಧರಿಸಿರುವಂತೆ ತೋರಿಸಿದ್ದಾನೆ.

ಆ ವ್ಯಕ್ತಿ ನಿವೃತ್ತ ವ್ಯಕ್ತಿಯ ವಿರುದ್ಧ ಮಾನವ ಕಳ್ಳಸಾಗಣೆ ಮತ್ತು ಹಣ ವರ್ಗಾವಣೆ ಪ್ರಕರಣ ದಾಖಲಾಗಿದೆ ಎಂದು ಹೇಳಿ ಬಂಧನದ ಬೆದರಿಕೆ ಹಾಕಿದ್ದಾನೆ. ಭೀತಿಗೊಂಡ ನಿವೃತ್ತ ವ್ಯಕ್ತಿ ತಮ್ಮ ಬ್ಯಾಂಕ್ ಖಾತೆ, ಎಫ್‌ಡಿ ಮತ್ತು ಉಳಿತಾಯದ ವಿವರಗಳನ್ನು ಹಂಚಿಕೊಂಡಿದ್ದಾರೆ. ತನಿಖೆಗಾಗಿ ಹಣ ವರ್ಗಾಯಿಸಬೇಕೆಂದು ಹೇಳಿ, ಸೆಪ್ಟೆಂಬರ್ 29ರಿಂದ ಅಕ್ಟೋಬರ್ 10ರವರೆಗೆ ವಿವಿಧ ಹಂತಗಳಲ್ಲಿ ಒಟ್ಟು ₹1,62,77,160 ಹಣವನ್ನು ಐಸಿಐಸಿಐ ಬ್ಯಾಂಕ್ ಖಾತೆಗೆ ವರ್ಗಾಯಿಸಲು ವಂಚಕರು ಒತ್ತಾಯಿಸಿದ್ದಾರೆ ಎನ್ನಲಾಗಿದೆ.

ನಿವೃತ್ತ ವ್ಯಕ್ತಿಯೂ ಸೈಬರ್ ಕ್ರೈಂ ಪೊಲೀಸರಿಗೆ ದೂರು ನೀಡಿದ್ದಾರೆ. ಪ್ರಕರಣ ದಾಖಲಾಗಿದ್ದು, ತನಿಖೆ ಪ್ರಗತಿಯಲ್ಲಿದೆ.

ಎಚ್ಚರಿಕೆ

“ಯಾವುದೇ ಪೊಲೀಸ್ ಇಲಾಖೆ ಅಥವಾ ಬ್ಯಾಂಕ್ ಅಧಿಕಾರಿಗಳು ವೀಡಿಯೊ ಕಾಲ್ ಅಥವಾ ಫೋನ್ ಮೂಲಕ ಖಾಸಗಿ ಮಾಹಿತಿಯನ್ನು ಕೇಳುವುದಿಲ್ಲ. ಇಂತಹ ಕರೆಗಳು ಬಂದರೆ ತಕ್ಷಣ 1930 ಅಥವಾ ಹತ್ತಿರದ ಸೈಬರ್ ಕ್ರೈಂ ಠಾಣೆಗೆ ಸಂಪರ್ಕಿಸಬೇಕು”